主打港日fusion嘅居酒屋一錢去年喺大圍先開業，深受街坊歡迎，再下一城於大角咀開設分店，供應平民化鐵板燒美食。環境輕鬆夠chill，價錢相宜性價比高，約埋三兩知己啤啤佢，嘆住佐酒小食就啱晒！
廣告（請繼續閱讀本文）
餐廳推出抵食北海道海產二人前套餐（$588），四款佐酒小食包括有鐵板燒北海道魷魚鬚、磯煮鮑魚、燒北海道帆立貝、燒廣島蠔，非常惹味香口，配啤酒一流，另加軟嫩嘅M9和牛牛腹心、蟹籽蟹肉炒飯等，兩個人份量啱啱好。
另外餐廳都有一啲新推菜式，極力推介三重芝士肉醬大阪燒（$98），芝士控一定唔可以錯過，帶啲港式風味嘅野菜大阪燒，面層鋪上肉醬同三款芝士，焗溶芝士可以瘋狂拉絲，超滿足！
廣告（請繼續閱讀本文）
地址：大角咀嘉善街 18 號利奧坊地下 G706 號舖
營業時間：12pm-3pm; 5pm-11pm
