聖誕節2021就嚟到啦，全港都有大大小小的聖誕裝飾和聖誕活動，當中不少都非常夢幻。香港迪士尼樂園每年都會有大大棵聖誕樹，而亮燈的環節也備受期待，更有人入園就為了睇聖誕樹亮燈，為求影靚相打個卡！近日Facebook專頁「生仔要考牌系列」就有人分享自己睇亮燈時的經過，怒指玩騎膊馬的家長無公德心，豈料網民竟一面倒取笑而非支持？
撰文：米娜 ｜來源：Facebook專頁@「生仔要考牌系列」、新假期編輯部、香港迪士尼樂園
矮妹港女遊迪士尼怒轟家長玩騎膊馬阻睇聖誕節樹亮燈
網民：你呢個高度企最前都只睇到樹根
Facebook專頁「生仔要考牌系列」貼出一位網民的投稿，該位女網民標題及首句就直指「有啲公德心好冇？」「希望睇到呢張相嘅家長反省下，你為咗唔想小朋友失望，但冇理由要其他在場人士失望！」從字裡行間都感受到充滿憤怒與無奈。
事主其後再詳細形容事件，指她本身在迪士尼等待睇聖誕樹亮燈，但因為身材矮小的緣故，只能夠睇到3/4棵樹，正當滿心期待之際，樂園一關燈，正值亮燈時刻，事主面前的5、6位老豆（家長）就舉高自己小朋友騎膊馬，令她和後面的人完全睇唔到聖誕樹亮燈的一刻，甚至連棵樹都睇唔到。
事主文末表示騎膊馬行為有安全隱憂，「其實咁做好危險，如果有人撞一撞，啲阿爸又企唔穩的話，個小朋友受傷邊個負責！？」最後一句就補上「唔該，各位家長有啲公德心好冇？」似乎對於被阻擋睇亮燈一事仍耿耿於懷。
網民看過帖子後在留言區幾乎一面倒稱事主小器，「騎自己老豆個膊馬都要俾你影相批鬥？」、「佢地有無打你尖？無的話咁問題唔係你有幾高，係你有幾早到」、「其實你呢個高度就算比你企到最前都係睇到樹根」、「但D小朋友都矮過你，你係咪要企所有小朋友嘅後面？」、「一把年紀為咗棵聖誕樹同班細路計較… 好肉酸囉」、「對於細路黎講，真係好想睇到，唔想剩係睇人背脊」等。
也有少數為事主抱不平的網民，「原來咁多香港父母係真心覺得我有細路係大哂，騎膊馬令後面完全睇唔到理X得你，其實香港人都唔係好過大陸人好多」 、「明白樓主睇唔到，其實大家將心比心，就等於你睇演唱會時，成班粉絲舉高哂牌」