廣告（請繼續閱讀本文）
廣告（請繼續閱讀本文）
無綫花旦張曦雯（Kelly）與圈外男友拍拖8年，近年愈愛愈高調，除間中被拍得公開拍拖放閃外，談起男友的體貼，Kelly更冧到爆，早已認定對方是可託付終身的人。外表溫柔的Kelly卻自認情路上性格一點也不浪漫：「反而生活上嘅小事，佢已經感動到我，好似佢明白我嘅工作性質，畀我足夠嘅空間，從來對我冇乜特別要求，知道我嘅缺點又會照單全收，所以我真係好好彩，連我父母都覺得佢好好。」
原來男友移居香港，主要原因都是遷就Kelly的事業需要，她說：「其實疫情期間，佢係可以返美國發展嘅，但佢都選擇咗留低，幸好佢依家喺香港都多咗嘢要做。」雖然Kelly即將要投入新劇拍攝，但剛過去的聖誕節依然沒有選擇過二人世界：「因為我成家及好多親戚今年都返咗嚟，所以要享受家庭生活呀，男友又OK喎。」
Kelly又透露男友性格「順得人」，但卻對一件事情有獨鍾：「就係佢好鍾意儲波鞋，每對鞋着完出街，都好有心機咁慢慢抹，喺屋企佢個鞋櫃大過我嗰個好多。（咁你又鍾意儲乜？）儲錢，同埋儲觀眾嘅認同及分數囉，哈哈！」
廣告（請繼續閱讀本文）
東網網站 : https://on.cc/東網Facebook專頁 : https://www.facebook.com/onccnews/