鮮浪潮未獲藝發局資助　杜琪峯認資金緊絀但「希望頂到80歲」

（獨媒報導）今屆鮮浪潮國際短片節本地競賽在未獲藝發局資助下，入圍作品由昔日十多部縮減至8部。主席杜琪峯承認資金緊絀，為維持營運須繼續「撲水」及「慳錢」。但他稱會盡力堅持營運：「如果我條命長啲，頂得到嘅話，希望頂到80歲。」

杜琪峯認今年經營艱辛 明年續有比賽

鮮浪潮周六舉行本地競賽頒獎禮。杜琪峯致辭時憶述，自己十多年前曾說過，如果仍身處香港，一定會支持鮮浪潮，直至「做唔到為止」。明年步入70歲的他，表明「出年一定有鮮浪潮比賽部份」，入且圍數量必不少於8部，團隊亦會盡力支持下去，繼續發掘本地新電影工作者。

被問到今年經營鮮浪潮會否特別艱辛？杜琪峯直言「係艱辛㗎啦」，指由去年決定接多少部短片開始，見到不少人想參加比賽，惟能力有限，只能盡量「慳」錢完成。他認為，香港電影工業須要承傳，指香港曾在世界上獲很大成就，亦有良好根基，認為應由一班較資深的電影工作者提供平台，「作為電影人應該要做嘅嘢」。

未獲資助需慳錢籌錢　稱「唔緊要、事情上上落落必然有」

過去三屆鮮浪潮國際短片節，先後有參賽短片未獲發准映證需取消上映，以及被刪走部分片段。今屆未獲藝發局資助，杜琪峯笑言「不獲咗支持好耐啦，冇咩所謂嘅，做到咪做囉，做唔到唔洗話俾大家聽做唔到嘅」。他透露已有兩年不獲藝發局資助，每年約數百萬元：「俾咪俾啦，唔俾咪唔俾，亦都係咩人咩事啦，世界係咁樣啦，順流逆流啦，講都無用㗎，佢都唔會改。」

杜琪峯坦言，現時資金緊絀，要經常籌錢，「office就嚟無㗎啦」，靠數名委員「呢度幫吓手，嗰度幫吓手」，笑言「幾乎連司儀都唔想請」。杜又稱，「佢（藝發局）話你自己搞得掂呀嘛」，記者聞言即問：「你自己講搞得掂？」杜回應：「我點會話自己掂，我從來都未掂過，唔緊要嘅，事情跌落、上上落落必然有嘅，我諗上帝會好好安排。」

他指若要繼續營運，需要「撲水」及「慳」，並感慨經營18年亦遭人「藐嘴」：「你唔好以為呢個世界做好事有好報，無㗎，你記住呢個世界善良嘅人，未必得到善報，惡嗰個人未必好過，一樣嘅。」

版權: 禁止衍生