日本必去｜全球最大無印良品！3月奈良開幕
全球最大規模嘅無印良品分店將於2025年3月1日喺日本奈良縣橿原市開幕！呢間位於永旺購物中心（AEON Mall）橿原西村嘅旗艦店，佔地高達2,484坪，唔單止匯集品牌全線商品，仲有無印良品首間複合式書店咖啡廳同二手商品區，絕對係無印迷嘅天堂！
▲ 呢間全球最大嘅無印良品店，將賣場設計成一本實體商品型錄，商品會依照生活場景分為9大區域，包括家具、室內裝飾、食品、化妝品、服裝及戶外用品等。最特別嘅係，同款商品嘅唔同顏色、款式同尺寸都會完整展示，等大家可以直觀比較，輕鬆揀到心頭好！
▲ 新店最大亮點係無印良品首間複合式書店咖啡廳「本と喫茶 橿原書店」，由日本出版販賣株式會社營運，收藏約10萬本新書、熱門書籍同經典著作。「Café&Meal MUJI」會提供使用當地食材製作嘅飯糰、丼飯、咖啡及雪糕等餐點，所有餐點同飲品均可外帶，方便又貼心！
▲ 店內中央位置設有名為「Open MUJI」嘅社區交流空間，頂部天窗設計引入自然光線，空間以奈良縣產嘅吉野杉木建造，擺放約1萬本繪本及兒童讀物，適合一家大細一齊嚟放鬆休息，感受自然與文化嘅融合。
▲ 店內專設嘅「ReMUJI」區域，會販賣經過清潔及修復嘅二手家具、約2萬本二手書、門市回收後整修嘅衣物同生活用品，以及輕微瑕疵嘅特價商品。無印良品仲首次將家具、生活雜貨同服飾配件納入回收項目（部分商品如電器同衛生用品除外），店內更設有修復工房，修理同維護古董家具，推動資源循環！
▲ 為慶祝開幕，無印良品推出多項限定商品，包括「奈良縣編織的左右區分襪子」同「特大巧克力年輪蛋糕」等人氣甜點嘅加大版本。開幕期間（3月1日至9日），部分服飾同生活用品仲會以店舖限定特價銷售，記得mark低日子，搶購心水貨品啦！
全球最大無印良品
開幕日期：2025年3月1日
地址：奈良縣橿原市新堂町241-1的永旺購物中心（AEON Mall）橿原西村區
營業時間：10:00 – 20:00（本と喫茶橿原書店 08:00 – 20:00）
文字：香港人遊香港 ; 圖片來源：MUJI、良品計劃株式會社