英皇女團VIVA推出今年第3首派台歌《Morning Call》，有望染指叱咤生力軍組合金獎，甚至打入叱咤組合獎，VIVA的團歌《Topic Killa》和《DTR》，在903專業推介最高分別第2位及第7位，成績不俗。
第3首派台作品《Morning Call》正式上架，全新曲風令4位成員Ada（姜咏鑫）、Carina（李晞彤）、Macy（馬思惠）跟VALC（張鈊貽）的聲音辨析度提升不少，甜蜜中帶點青春活力。
新歌曲風跟之前兩首作品不同，她們表示唱法亦有變，以Sweet為主，Ada爆錄音時自己被監製「督促」：「佢成日叫我：『笑！開心！唔夠sweet﹗』，所以我長期喺錄音室入面，我諗住開心嘅早餐，然後笑住去演繹呢首歌。」舞蹈方面，4人坦言有進步，隊中主音Macy跳舞較弱，不少網民讚她今次有進步，為她注下強心針：「我見到有人comment話我第3隻歌跳舞有進步，希望大家下一年再讚我唱歌又好咗、跳舞又好咗、表現力又好咗啦，所有嘢都好啦。」
歌曲簡單直接描述戀愛時忐忑的少女心事，又以咖啡因比喻對喜歡的人上癮，問到VIVA有否試過對人上癮，Ada曾對《怪獸公司》的角色「毛毛」上癮，她說：「可能因為一開始佢嘅形象好嚇人，但其實內心係好溫暖嘅人，佢好細心，呢一個係我畀佢Charm到嘅一個位，我大個咗之後，我對人或者睇嘢都唔會淨係睇表面。」
從小喜歡Taylor Swift的Carina，曾試過即日來回飛新加坡看偶像演唱會：「嗰陣時準備去韓國training，Taylor Swift嘅演唱會都係同一段時間舉行，同公司溝通後有檔期，於是我就飛咗去新加坡度睇，即日來回咁返嚟香港。」
不過最瘋狂要說是VALC，曾有一段時間對漫畫《排球少年》的主角之一「月島」上癮，更對他無限FF，她說：「我會上網買佢件波衫，但唔知點解要買，因為我冇乜着過；我又唔知點解夜晚真係會係咁諗住如果呢個『月島』，係一個真人嘅話會係點樣，希望佢可以變真，我係咁諗住佢，覺得我喺呢個咁嘅Situation嘅話，佢會點樣做呢？好多呢啲FF。」
歌曲當中Rap嘅部分，再次由VALC主理，靈感亦全憑她的FF：「我係Imagine如果有一個伴侶，同我一齊起身嘅話，我會想點樣講呢？但同時間我又想型型哋講呢句說話出嚟，同埋我個Invision就係佢要返工啦，但走之前你都要記住輕鬆啲，就係Before you leave, please celebrate，即係我希望就算今日有乜嘢工作、有幾攰都好，我哋都記住要開心、要玩。」
臨近年尾，總結過去1年表現，VIVA直言有不少得着，唱歌及跳舞有進步空間。Ada直言感覺比之前輕鬆，因為開始熟習錄音模式；Carina表示未入公司前，所有事情是自己一手一腳去做，加入公司後，最初以為很多事情需要公司作主導，她說：「但原來公司畀好多空間我哋去自主處理、好願意聽我哋00後嘅意見，亦有好多parties幫忙，再學識team work要放手畀人哋一齊做，唔可以自己一個做晒。」
VALC對今年表演滿足：「見到大家對跳唱嘅成長，可能大家一開頭跳唱係唔夠氣，𠵱家好好多，穩定好多。希望下年會更好，繼續各自發掘自己擅長曲風同style。」Macy笑言自己最大的進步是身體健康：「對於第3隻歌嚟講，我係冇病冇痛。因為之前成日腳痛、頭痛，唔知邊度痛，但嚟到第3隻歌我好健康，我最大嘅進步就係身體健康。」
（即時娛樂）