奧運發現筍工？ 巴黎賽場出現「遙控車」負責幫手運送體育器材

雖然巴黎奧運進入尾聲，但話題依舊不絕，其中有網民喺現場睇標槍比賽嘅時候，留意到賽場上有「遙控車」出沒，而引起咗網上熱烈討論？

事緣就係網民見到標槍比賽現場工作主要需要兩名工作人員，一位負責操控遙控車前往被投擲標槍嘅地方，而另一位就負責喺車抵達時將標槍放上車，再由遙控車將標槍送回起點，而見到呢個畫面，網民就不禁表示非常羨慕呢個工作啦！

而據外媒報道，呢啲車仔係巴黎奧運同豐田汽車合作製造，正式名稱為「現場支援機械人」（field support robot）。而除咗標槍，鉛球同鐵餅等體育器材都可以利用遙控車幫手運送，佢哋尺寸都唔大，高度不到人類膝蓋。

而事實上，呢類機械人其實唔係第一次喺奧運出現，喺2020年東京奧運就利用多款機械人幫手搬運，以及同運動員、觀眾溝通交流等工作。而講到其他賽事，最出名就係2020年歐洲盃出現一架仿大眾ID.4遙控車，車身更塗成彩虹色，象徵對全球LGBT運動嘅支持。

不過比起關注遙控車，大家好似更加羨慕工作人員可以唔駛郁，輕鬆操控住遙控車做嘢，但同時又可以最近距離睇住奧運選手喺你面前比賽，咁樣諗又真係幾正喎？睇來可以試吓等到下屆奧運去報名申請做義工啦！

▼Follow GadgetGang HK
YouTube: https://www.youtube.com/@GadgetGangHK
Instagram: https://www.instagram.com/gadgetganghk/