香港身為一個國際化嘅城市，唔同大大小小嘅商場入面都係世界各地品牌連鎖店。香港人行得多可能都開始生厭，如果大家中意尋寶，又或者中意大品牌以外，又比較特別嘅店舖，其實唔一定要去其他國家、城市先有㗎！小編為大家精選咗10間香港有特色嘅尋寶小店，大家有興趣不妨去行下睇下，包大家有驚喜啊！
小編之所以會稱以下店舖為「尋寶小店」，因為入面賣嘅嘢真係估你唔到咁特別啊！當中有好多產品都係各店主四處搜羅返嚟嘅小物、中古年代嘅產物等等，件件產品都又靚又有歷史，出面幾乎唔會搵到，所以大家入到去真係要花時間慢慢尋寶先得啦！
1. 貘記
貘記係一間位於港島區嘅雜貨小店，店主有時仲會舉辦唔同展覽及工作坊，大家除咗可以上去見到好多唔同又靚又有特色嘅復古小物外，只要捐助小店，店主就會請大家食甜品、咖啡！
入面嘅小物都係店主多年去旅行、公幹時儲落嚟嘅，所以有好多唔同世界嘅復古小物，包括餐具、精品、文具、布藝品、玻璃製品等，大部分都獨一無二，設計又精緻又吸引！
貘記
IG：Hellomakee
FB：貘記 Makee
地址：灣仔軒尼詩道365號富德樓8樓
2. 常常集品
常常集品以出售古道具為主，一入店舖已經予人一種古舊又舒服嘅感覺，入面所出售嘅都係一啲特色舊物，每件貨品嘅數量唔多，如果鍾情日本舊古物嘅朋友更加要去睇下啦！
店內有售日本昭和晚期木箱、於2008年結業嘅中環著名老字號「永和號雜貨店」舊單據木箱、香港舊巴士車票、日本漢字鉛字粒、於2006年結業嘅香港唯一上海式澡堂「浴德池」所用號碼牌等，其實當中小編最中意嘅係，店主會喺IG/FB為大家逐一介紹每件古物嘅歷史故事同由來，真係好有心思之餘仲令人大開眼界！
除咗舊物外，仲會出售部分特色小物，如福岡縣一位陶藝家所製嘅得意麵包碟、香港陶瓷家製作嘅陶瓷餐具等等，簡直係新舊物都包羅萬有啊！
常常集品
IG：changchang_goodstore
FB：常常集品 ChangChang Goodstore
地址：油麻地上海街273號1樓
3. 賣仔勿摸頭
呢間「賣仔勿摸頭」，聽個名除咗覺得特別之餘，都好表達到店主真係好中意古物，當佢哋仔咁「一摸眼淚流」啊！而入面所賣嘅二手舊物真係睇到小編哇哇聲好震撼，店舖主要係香港及各地舊物收藏買賣為主，當然入面件件舊物價值不菲，不過唔一定有嘢買先到舖嘅，大家都可預約入去參觀㗎！
店主本身為係一個收藏家，所以入面嘅舊物真係好誇張，有60年代上海師傅製嘅女賓理髮椅、香港昔日人力車、60年代幼稚園學生櫈仔、舊時香港手寫牌等等，連59年前嘅綿羊仔都有⋯⋯淨係睇相都已經好震撼，好似時光倒流到舊時咁啊！
賣仔勿摸頭
IG：sellsondonttouchhead
FB：賣仔勿摸頭
地址：葵涌永建路二號永健工業大廈21樓I室
4. Sunfafa / MoonChouChou
大家可能會好奇點解一間舖會有兩個名呢？其實因為呢間小店係由一對情侶Dick同Christy設立嘅，入面主要出售二手古著服飾，另外仲有部分由日本、歐洲等地搜購嘅懷舊小物。
想睇女裝古著同小物嘅可留意Sunfafa，而男裝古著就可留意MoonChouChou啦！
情侶檔店主以家庭式經營小店，而其實小店都係佢哋所住嘅地方，所以入到去總比人一種「70年代家的感覺」，環境非常舒服，入面嘅一磚一物都好靚好重懷舊感，店主仲會好好人咁為大家斟茶遞水，大家都可以坐底同店主傾下計，因為店內嘅傢俬電器都好有故事，並唔似一般商店咁講嘢只得「Hard Sell」，上次小編去到真係傾到唔願走啊，不過記得要除鞋先好入屋啊！
Sunfafa / MoonChouChou
IG：sunfafavintage / moon.chou.chou
FB：Sunfafa / moonchouchou
地址：深水埗基隆街108號唐7樓(8/F)
5. A Beautiful Store
如果中意一啲較特別，但並非懷舊、二手古物嘅話，A Beautiful Store都係一個尋寶之選嚟㗎！A Beautiful Store主要出售特別而且以美學為主嘅器具、服飾以及生活用品，入面不論店內裝修以至商品都非常簡潔樸素，商品都偏向女性為主，啱曬中意文青風嘅朋友啊！
A Beautiful Store
IG：abeautifulstore
FB：A Beautiful Store
地址：太子太子道西194號3樓
6. 黑地
中意型格同日本鋼具嘅朋友注意啦！呢間位於石硤尾嘅山貨店「黑地」，主要出售以竹藤、木等大自然材料製成嘅山貨食具，而且仲有鋼具賣，環境簡約舒適，入面擺放嘅商品非常整齊又有條理！
入面出售嘅嘢都好多元化，包括最近提倡嘅不銹鋼飲管、濃厚本土情懷嘅駱駝牌水壼、特別廚食鋼具等等，而且選址好近經常舉辦市集嘅JCCAC，大家經過不妨入去尋寶啦！
黑地
IG：waichistreetplayground
FB：黑地
地址：石硤尾偉智街38號福田大廈19-20號地舖
7. 陸日小店
呢啲咁特別嘅小店又點止存在喺繁榮嘅市區呢！就連坪洲都有㗎！位於坪洲嘅呢間「陸日小店」之所以得此店名，係因為小店只會喺逢星期六及日營業，所以有興趣嘅朋友要留意營業時間啦！
呢間陸日小店所出售嘅，都係店主從世界各地跳蚤市場搜購返嚟嘅復古家品，例如法國嘅咖啡杯、70年代英國風扇、西德製造並擁有幾十年歷史嘅小型加算機等，所有商品都非常別緻，感覺好似喺店內環遊世界咁啊！
陸日小店
IG：sunsatstore
FB：陸日小店
地址：坪洲永興街27號地下
8. MIDWAY shop
MIDWAY shop相信對一眾中意去深水埗買布嘅朋友並不陌生，而當中所出售嘅精品都係同兩位店主旅遊期間所見所聞有關嘅，入面所賣嘅精品都非常得意㗎，包括日本富士山精品、日本人氣插畫家Noritake精品、以至手袋、帽子、飾物都有！
MIDWAY shop
IG：midway.shop
FB：MIDWAY shop
地址：深水埗基隆街132B地下
9. 婆婆雜貨店
婆婆雜貨店所出售嘅商品舒適清涼嘅感覺，多數都係一啲粉色嘅日本商品，總帶住一種少女味。入面除咗有可愛嘅精品如富士山琉璃水瓶、粉色陶器套裝、日本製東洋佐佐木酒杯外，仲有衣物、Totebag出售，所以話雜貨店真係包羅萬有㗎！
婆婆雜貨店
IG：grandmama.store
FB：婆婆雜貨店 Grandmama Store
地址：紅磡老龍坑街17號地舖
10. 文化屋雜貨店 Bunkaya Zakkaten
「文化屋雜貨店」喺日本其實一直都非常流行，2009年終於從日本進駐香港，入面主要都係售賣懷舊日系商品、衣物首飾、精品家品、手袋等，店內擺滿貨品睇到大家眼花瞭亂，真係好啱入面尋寶㗎！
商品種類不論咩風格都有，古怪、有趣、復古、誇張嘅都有！入去慢慢搵慢慢睇，總會發現好多神奇有趣嘅小物，好啱中意花時間尋寶嘅朋友！
文化屋雜貨店 Bunkaya Zakkaten
IG：bunkaya_zakkaten
FB：文化屋雜貨店 BUNKAYA ZAKKATEN
地址：尖沙咀金巴利街22號1樓
香港其實唔止得大品牌商舖，大家只要慢慢搵，其實仲有好多默默用心經營嘅店主，為大家帶嚟好多有特色嘅商品！大家可以入去搵到與別不同嘅商品，平時行商場行到厭嘅朋友，記得去發掘下香港嘅另一面啦！
圖片來源：IG@Hellomakee、changchang_goodstore、sellsondonttouchhead、sunfafavintage、moon.chou.chou、abeautifulstore、waichistreetplayground、sunsatstore、midway.shop、grandmama.store、bunkaya_zakkaten
Text: Holiday Editorial
（小編公告：如果讀者有任何關於美食、旅遊、玩樂、或者任何新奇有趣事物既資訊，都歡迎話比小編們知～大家可以透過Facebook inbox、或者send e-mail到holiday@presslogic.com，直接將資料傳比小編）
