今年適逢係香港警隊成立175周年，TVB同ViuTV都同時會於今個月播出兩套同以警隊機動部隊PTU做題材嘅電視劇！兩套題材都一樣，唔知你又會睇邊套呢？
撰文：東方新地｜圖片：新傳媒圖片庫
TVB《機動部隊2019》
適逢今年係香港警隊成立175周年，TVB將於今個月12日播出一連四集、與香港警務處聯合製作嘅劇集《機動部隊2019》（前名《警察故事2019》）。
之前喺《鐵探》中天人相隔嘅Matt sir（楊明飾）與招喜悅（蔡思貝飾）將會再度重遇，再續前緣，皆因二人會於《機》中齊齊做PTU行孖咇！
據知，劇中演員拍《機》時亦經歷唔少真實中機動部隊成員要經歷嘅事，例如親身體驗被胡椒噴霧勁噴嘅滋味！其中，蔡思貝亦有份拍攝《機》，於訪問中坦言被噴胡椒噴霧：「好辛苦，真係毫無控制地流眼淚、流口水、流鼻涕，成個腦係麻痺，然後唞唔到氣、呼吸困難。」
不過，TVB早前就率先上載咗幾集喺網上畀大家睇，結果有網民表示覺得劇集節奏比較慢，而且畫面色調到好暗，睇得好辛苦咁話，唔知到電視播出時係咪都係咁呢？
ViuTV《PTU機動部隊》
另一邊廂，打對台嘅ViuTV同樣會將於今個月9日播出《PTU機動部隊》，新劇會由林峯、蔡卓妍、方中信領銜主演！
加上，仲有譚耀文、林雪、張繼聰、温碧霞、苑瓊丹、石修等實力派演員，相當人強馬壯！
此劇故事講述卧底警員高家聲（林峯飾），搗破黑幫組織後重返警局並加入PTU，與女沙展何慧玲（蔡卓妍飾）和鐵面無私嘅隊長劉建暉（方中信飾），經歷一連串誤會後，建立起同僚之間嘅感情！
相信唔少人都知今次係林峯時隔五年再度回歸接拍港劇，單係呢個原因已令粉絲十分期待！而且，更值得一提嘅係此劇係林峯入行21年嚟首次未試過着制服拍劇！
日前，林峯出席劇集造勢會，更分享自己拍攝外景行咇時，好多市民都誤以為佢哋係真警察！最搞笑係就連拍「掃樓」戲時，亦撞到真警務人員，搞到連對方都覺得奇怪點解會有另一隊人「掃樓」。
劇集中亦不乏唔少槍戰、爆炸場面，而且亦會有警民衝突，相信會引起觀眾一定共嗚感！
Tvb汁得 完
2019年05月07日15:24
顯示全部