【理財教室】月供股票啱懶人投資　平均成本法長線贏面大？

今個星期五（17日）係兔兔生日，兔兔見自己又大一歲，就想為自己未來多作打算。不過呢幾年，兔兔喺股票市場上交咗太多學費，而家嘅佢比較傾向一些穩陣而又低風險的投資方法。

兔兔：新型冠狀病毒疫情搞到環球股市咁「Chok」，目前市場上仲有冇一些理性而又安全的投資工具？

熊大：要穩陣又安全的話，可以考慮月供股票。

兔兔：但我唔係好清楚月供股票背後嘅概念，熊大你可唔可以解釋一下？

熊大：月供股票又被稱為「懶人投資法」，背後理論係以「平均成本法」進行投資，月供股票計劃通常要進行半年或以上的時間，目的係想分注吸納股票，以平衡整體的投資效益，降低市場波動帶來的風險。

兔兔：但我唔太明白，個市跌就話低價買入股票；但如果個市係咁升，買入的成本咪會愈來愈貴？

熊大：月供股票，顧名思義係指每月以指定銀碼買入股票。股市升的時候，可以買進的股數自然較少；但係跌市的時候，股價就會變得便宜，可以買進的股數就會相對較多。

熊大繼續說：月供股票的對象通常係大型股，投資者看好其中長線走勢，唔會擔心短期股價波動造成的賺蝕風險。好似而家身處熊市之中，月供股票就不失為一個相對穩陣的投資方法。以月供股票的形式，押注喺有升值潛力的大型股票身上，他日市況轉好，贏面就會大咗。舉個例子，如果有人十年前已經月供騰訊（700.HK），而家應該已經賺咗層樓或者首期。

兔兔：咁月供股票的入場門檻高唔高？好多大型股的入場費都好貴，一般小散戶一手都未必買得起。

熊大：月供股票的供款方式有兩種。一種係每月供款金額固定，例如月供金額5,000元，所買入的股份數量就會隨股價而定，呢個情況下，好多時每月買入的都是碎股，而唔係完整的一手；另一種係每月供股數量固定，例如每月供200股，咁每月的供款額就會隨股價變動而有唔同。

熊大繼續說：而家市面上最平每月500元就可以開始月供股票計劃。財力相對有限的散戶就可以用較低的入場費買到心宜的大型股。

兔兔：除了入場費吸引，月供股票仲有咩好處？

熊大：頭先都提到，月供股票係一種長線投資策略，唔使太擔心短期股價波動，啱晒一班低風險又冇乜時間打理投資組合的人。

熊大繼續說：而家好多銀行的月供股票計劃仲可以賺埋信用卡積分，呢個好處啱晒兔兔你知慳識儉的性格。

（編按：值得一提的是，每月最高供款金額將受限於相關信用卡的信用額。本內容並非投資意見，亦不構成任何投資產品之要約、要約招攬或建議。）