被封為宇宙級港女嘅吳若希（Jinny）早前大玩「30 days婚變challenge」，目標係每日都讚一個老公Alex嘅優點，為婚變闢謠。不過吳若希日前在尖沙嘴出席美容店活動，對於早前佢被影到帶囡囡到幼稚園面試PN班，期間見老公Alex不斷傾電話便黑晒面，吳若希回應就直認同老公感情好淡，冇乜話題！
撰文：東方新地圖片：吳若希Instagram、AlexHoIG、新傳媒圖片
吳若希 同老公感情淡薄冇話題
日前有讀者向傳媒爆料指見到吳若希帶女兒到一所幼稚園面試，期間見老公Alex不停傾電話於是黑面睥實佢，吳若希被問到此事時表示希望囡囡入讀呢間學校，但就冇印象曾對老公黑面：「我好少喺公開場合黑佢面，最多只係無表情，返屋企先反白眼，通常有囡囡嘅時候我係唔理老公！」她坦言2歲囡囡太可愛所以無暇理會老公，問到會否令人覺得夫妻感情好似好淡薄，她回應話：「係呀，同佢唔係好熟呀依家，我哋好少傾兩個人嘅嘢，話題都係講個女，有時打開話題係話女兒得意或者講工作。」
講到老公Alex由澳門搬到香港居住在港少朋友，吳若希說有介紹朋友畀老公認識，又話會幫手宣傳丈夫的生意。講到今個月23日係囡囡生日，她決定稍後帶囡囡去主題公園。
傳吳若希婚姻亮紅燈
吳若希早前突然於個人社交網發感性文，寫道：「一根刺，種下後會慢慢發芽，到它長大後，會變成刀～婚姻中的忍讓不是必然，現實不是宮廷劇，夫妻關係也不再是#日月存亡 。對不起 我不認同妻子要為不愛（不懂愛）她的男人卑躬屈膝。」，睇落似乎空穴來風！
發文一出，大家隨即不斷猜測吳若希同老公 Alex婚姻係咪出現咗紅燈！但其後，Jinny就向傳媒表示自己都唔妥老公好耐，又食煙、又成日喺被竇放臭屁，講到明忍夠老公咁話！起勢投訴老公，睇嚟真係好不滿喎！但原來Jinny係為熱播緊嘅《如懿傳》所主唱嘅主題曲做宣傳！睇嚟Alex都幾忍得Jinny，皆因自己老婆竟然為咗宣傳新歌而大爆咁多老公日常出嚟俾大家知。
玩「30日婚變challenge」
早前Jinny更在Instagram許下一個為期30日的「婚變challenge」，她說睇得太多有關自己婚變的報道，「令我自己都開始產生幻覺 覺得自己想離婚」，在這30天的挑戰中，她要每天說老公一個優點，證明自己有幾愛對方。她第一天寫：「#day1 脾氣好，怎麼發他脾氣，他也是沒有表情」
唔post代表搞緊離婚
第二天則寫：「#day2簡單～我老公是一個很簡單的人，覺得這個世界有壞人～ 所有人都是朋友，所有人都沒有私心，所以他也經常被人利用、擺上檯～ 有時我會很討厭他這種簡單，因為這種簡單麻煩了他身邊的人（比如我…還有他媽），但換個方向想，幸好他簡單，我才能肯定我是他的唯一。有時他的優點也是他的缺點，夫妻便是接受他的缺點，把它變成優點💙」
有網民話佢係數緊老公嘅缺點，而唔係優點，更有人指Alex畀Jinny擺上枱，但吳若希親自留言回應網民：「如果我有一日無post 果日應該真係準備緊離婚！」
Jinny：老公真係好鍾意通渠！
而第12日，Jinny表示老公優點係「不介意分擔家務」，事緣Jinny買了通渠水準備通渠，點知老公爭住幫手仲喺廁所睇咗幾分鐘未走，Jinny話「佢真係好鍾意通渠！」
Day 30，吳若希話老公嘅優點係瞓覺唔郁，保持同一姿勢到天光，令愛大字形睡覺的她可以霸晒4分3張床！
「30 days婚變challenge」話咁快就完成，Jinny喺day30「終章，愛的感悟」中坦言﹕「首要目的並不是想放閃、或是炫耀Alex對我有多好，而是在那段時間我倆之間有一些不算大、不過也不算小的磨擦，個人情緒最低落的時候，我甚至一度懷疑自己當初選擇了他的決定是否正確……」
但冷靜下來發現無人完美，更表示呢個30日婚變挑戰中重新找回愛對方嘅理由：「幸好，在這一個月裏，我真的能夠一步一步，重新學會欣賞他的優點，而心態上我也成功調校到我當初認識他的時候。原來，當我再次把他優點放大的時候，我才知道我對他的感覺根本絲毫沒有變過，我仍然是那麼的愛他、想關心他、想照顧他、想和他一起終老。」
Alex隨後留言多謝老婆發掘到佢咁多優點，仲話：「這女人常常問我『我係咪好惡？我係唔係好野蠻？我係唔係好任性？』此時此刻，我只可以引用某天王的金句『係，你好惡，你好野蠻，你好任性，但，係我揀的。』如果你唔惡，唔野蠻，唔任性，這就不是你，這就不是當初我選擇的你。」
Alex又話：「多謝妳，多謝妳給這個溫暖的家，多謝你給我那麼『打意』的小女孩，沒有你，我甚麼都不是，沒有你，我不會撐到今天。I Love you until the end of my life.」
吳若希剷爆老公客人
Jinny被網民封為「世界級港女」，事緣吳若希在旅程中突然在IG貼出兩父女的背面相，從背景中看到Paris Las Vegas Hotel的鐵塔，畫面相當溫馨 ， 但留言非常惹火， 吳若希留言 :「真心，我老公真係好愛呢頭家，成個美國trip有大部分時間都在講電話傾生意，但so far沒有一單有回覆。真的只是跟客人齋傾。」
吳若希表示她落機都要準備工作，而且還要照顧BB，所以她霸氣地跟老公的客戶表示:「我希望那些齋吹水、冇行動的客人、不要再 打給我老公了!因為你浪費了我一整個旅程!」可是吳若希不久就刪除內文，只餘下相片，總算知衰。
次次衰衝動
做藝人，負面新聞一單都嫌多，吳若希偏偏喜歡以 身犯險，口沒遮攔到處起火頭，做咗人媽咪講嘢一樣唔 經大腦，一次又一次闖禍，早前明寸明笑同門師妹菊梓喬拎「最受歡迎女歌星」，已經被網民插爆做人小家。
日前播出的無綫旅行節目《東京血拼攻略》，吳若希去到限量二手名牌特賣場，帶頭拉住林穎彤瘋狂跑入去，一路跑一路大聲話:「嘩!好靚啊!」吳若希光速 跑入會場搶包包，連當地導購翻譯都畀佢嚇窒彈開，入到去見到 個罕有名牌篋，吳若希仲癲咗咁攬實話要買!
去到新宿百貨尋寶，吳若希見到林穎彤拎 咗個小巧嘅名牌背囊，大叫大笑話:「好打耳!好打耳!」林穎彤又大笑附和:「好打耳!」二人失晒控，台灣女主持沈韋汝忍不住「殊」出聲示意佢哋安靜。網友指成個節目只聽到吳若希又笑又大聲講嘢，見名牌即失控嘈喧巴閉。
之後吳若希去咗一間二手名牌專門店，例牌見到名牌自 high狂笑，仲無視店內貼咗兩個「Please Don’t Touch!」的英文警告標 語，見到價值 1,500萬日圓(約 100萬港元) 嘅限量行李箱就出手摸，仲邊摸邊話:「我 就冇錢買㗎喇，摸吓都好!」即被網友狂轟失禮自己影衰港人。
不過，最嚴重的指控是身為人母的吳若希與台灣主持沈韋汝對談，不停指自己是「釣蝦女皇Queen of 釣蝦，令台灣主持不明她所指而面露尷尬，此時吳若希又自high喪笑，失禮又失儀，事後有網民要求踢吳若希出節目！
踏入19年後吳若希繼續流年不利，先被指不 屑同門的菊梓喬獲「最受歡迎女歌星」，喪笑贈興寸爆對方未夠班，之後又被爆鬧老公客戶，是非纏身難怪日前要在放正能量post，話新一年期待新開始。
吳若希6大講錯野得罪人時刻
1. 暗酸 Hana 非實至名歸
《2018年度勁歌金曲頒獎典禮》後有記者問吳若希覺得Hana是否實至名歸時，她竟回答「如果佢係計投票率嘅話係值得當選㗎喎。」是在暗示Hana贏獎靠的只是投票率而不是實力？
然後再講到上年男女歌星獎合併為一獎，但今年就分番開，有指是想造就Hana奪得女歌星獎時，Jinny就謂：「就算造畀佢都應該呀，始終自己公司嘅人，佢啲歌係真係Hit，依家冇乜邊個香港歌手嘅MV係差唔多隻隻都過到百萬點擊率。」
有不少網民都覺得 Jinny 如此回應是扮大方、實質句句有骨。除了回應被人指責外，她聽到 Hana 得獎時的誇張反應亦相當耐人尋味。
去年底Hana在台慶頒獎禮獲「最受歡迎電視歌曲」，吳若希即時在菊梓喬Ig留言：「恭喜你呀一姐」，被網民解讀成她暗寸菊梓喬未夠班。
2. Jinny 於2019台慶講錯野！
2018年《千星輝賀台慶》 播出，約個半鐘的節目找來多位藝員表演。節目開始約半個鐘就搵嚟周柏豪、袁偉豪同胡鴻鈞表演射籃。
問到吳若希支持誰時，她就話：「我個心就係支持胡鴻鈞，不過TVB份稿叫我支持周柏豪！」
Do姐都不禁講句：「乜你咁㗎？」連叻哥等人都忍不住指責她倒米。有網民就相信此言論一出，吳若希應該會被TVB高層「照肺」！
3. 曾在Facebook指控雨運令小巴停駛
2014年10月上旬，香港爆發雨傘革命，吳若希在facebook埋怨示威集會令小巴停駛，影響市民正常生活，更令公公婆婆去醫院復診的成本增加。
結果曾被捧為高登女神的她，被網友唾棄。網民多指長者假日坐公共交通工具會有優惠，她對集會人士的指控並不成立。
其後她解釋自己是針對集會人士，沒指明是「佔中」還是「反佔中」，但網民並不接受她的解釋。
4. 合照被指諷鄧麗欣老！
吳若希因反雨運得罪了高登仔，被除名女神後，在網上人氣下挫了不少。2014年12月，她上載了一張與鄧麗欣的合照，留言又再起風波。
這張照片於吳若希出席2014年雅虎香港頒獎禮時，在後台碰上鄧麗欣時拍攝。她還留言說：「我初戀時已經聽她的歌∼∼」
網民認為吳若希此言，是在暗諷鄧麗欣年老，為人很有機心，群起插爆。而其實鄧麗欣只是年長吳若希9年，結果吳若希全程「任插」不敢回應。
5. 貼陳嘉佳比較照曲線抬高自己
2015年1月上旬，吳若希在facebook發出新年後第一個近況，就是她與陳嘉佳（細細粒）的照片比較，留言說：「小寶絕對是一個美女！」
此近況發出後，立即招來網民的痛罵。有網民指吳若希用意是貶低小寶，曲線讚自己靚，用心不良；更有網民叫她出帖前「唔該用下個腦」。
6. 幫老公趕客！
之前 Jinny 同老公、bb去美國旅行時，她在 Instagram 上大數老公的客人沒有行動、只吹水，令好老公白忙一場，浪費成個旅行。
不知道和她老公傾過電話的客看到 Jinny 如此抱怨後會有什麼感覺呢？