成日都話以前嘅TVB劇集真係好正，經典啊嘛～回顧成日都有，近排見到已經闊別TVB好多年嘅向海嵐，喺四川為當地嘅荔枝旅遊節做宣傳而再次著上古裝扮演楊貴妃！網上都引起一陣熱烈討論，有網民仲話佢個樣無邊過添！
就咁睇啲相真係以為係拍劇啊！
原來之前向海嵐喺《楊貴妃》入面飾演楊玉環一角，已經係18年前嘅事喇！
不過，除咗《楊貴妃》，向海嵐主演嘅另一套TVB古裝劇都非常受歡迎。而呢套劇，相信好多人都睇過，真係經典中嘅經典 - 《無頭東宮》！小編真係一聽主題曲前奏，就有啲起雞皮唔係講笑！
《無頭東宮》主題曲 - 情的代價
如眼睛可分對或錯
這麼一瞬間看清楚我麼
藏於心底那真誠
如何共你譜千載情歌
從我的身份判別我
這麼的女子會否深愛麼
如外貌讓人錯用情
如何令你看真我
來看一次清楚
哭吧
是我不懂得欺詐
是你不懂我的好嗎
仍然相信真誠是我深情未變假
來吧看吧
盡窮一生不可怕
盡窮此生不怨不悔不恨
這是情的代價
2002年嘅劇集，《無頭東宮》意外地受歡迎，最高收視仲有成37點添！
向海嵐演出嘅楚楚呢個奸角演得出神入化，仲被網民大讚！
除咗向海嵐（凌雲-->楚楚），主演嘅仲有陳妙瑛（楚楚-->凌雲）、張兆輝（皇帝）同魏駿傑（換臉大師 蕭濤）。
劇情大概係咁樣開始，淩雲（向海嵐飾）人靚心地好，不過自細就喪母，同父親相依為命，為咗可以一直留喺父親身邊，不惜扮醜以避開上門求婚嘅人。喺一次園遊會，淩雲無意中救咗微服出遊嘅皇帝，因而種下情根，皇上回宮後決定納淩雲為妃。細妹楚楚（陳妙瑛飾）知道後就非常妒嫉佢…
依家睇番當年嘅CG技術當然係好膠喇，但係喺當時黎講都算係咁喇！楚楚（陳妙瑛飾）因為妒嫉凌雲（向海嵐飾）嘅美貌同雲妃嘅身分，就要求換臉大師（魏駿傑飾）幫自己同凌雲換臉呢一幕，令觀眾留下深刻印象。
換臉之後向海嵐就變咗飾演楚楚，由好人變咗奸人，奸詐嘅表情演技發揮得淋漓盡致，真係奸到出汁㗎！
有無人同小編一樣，即刻想重溫番套劇？
Text: Holiday Editorial
（小編公告：如果讀者有任何關於美食、旅遊、玩樂、或者任何新奇有趣事物既資訊，都歡迎話比小編們知～大家可以透過Facebook inbox、或者send e-mail到holiday@presslogic.com，直接將資料傳比小編）