近日杜汶澤同田蕊妮嘅愛貓Momo突然離世，雖然兩公婆極度傷心，但失去至愛令佢哋再次對生命有所頓悟，從阿澤嘅悼文中可以感受到佢哋對MoMo早已超越人類同寵物嘅關係！其實圈中都有好多資深貓奴，對於主子，甚至比親人更親！
撰文、圖片：東方新地
蔡卓妍為愛貓砌「 城堡 」
愛貓取名嚦咕，阿 Sa 亦稱呼嚦咕為「 老細 」，嚦咕更長期佔據著阿 Sa 嘅社交平台。早排阿 Sa 留家自我隔離，就花咗兩粒鐘砌咗個「 城堡 」，方便主子遊樂放電。
鍾欣潼搵動物傳心師幫手溝通
阿嬌嘅愛貓叫QQ，為咗更加了解愛貓，阿嬌仲特登去搵動物傳心師幫手溝通。阿嬌話 QQ 最唔鍾意佢玩手機，因為主子怕光呀！
舒淇十八歲開始就養貓
貓奴舒淇自十八歲開始就養貓，當年第一隻養嘅金吉拉取名 May。2013年聖誕節，老公馮德倫送贈一隻同一品種，為紀念 May，舒淇替新主子取名 MayMayBoy，又怕佢寂寞，仲多養一隻白色金吉拉，改名 MayMayGirl，互相陪伴。
鄭秀文自稱與貓有緣
Sammi 一向愛心爆棚，同老公許志安飼養狼狗「 Lucky 」及英國短毛貓「 肥Mike 」。Sammi 自稱與貓有緣，曾表示鄰居搬走後留下老貓 Coco，佢就同另一鄰居合力照顧對方，直至 Coco 終老離世。
周秀娜勁嗲異國短毛貓
主子波波係異國短毛貓，奴才周秀娜自言對呢個品種特別有研究，佢哋呼吸系統較弱，腸胃亦比較差，要特別關注。Chrissie話每次返到屋企，波波都會喺佢腳邊兜圈，然後瞓喺地要佢摸，勁嗲！
陳靜愛貓床上小便又嬲又好笑
DaDa 兩隻貓分別叫 MiMi 同小虎，有一次佢唔記得清潔貓砂盆，兩隻貓故意喺佢床上小便，最後搞到床單、床褥都要換呀陰功！
杜汶澤、田蕊妮 愛貓每晚等主人回家
杜汶澤同田蕊妮飼養金吉拉貓Momo七年，近日不幸離世，夫妻分別喺社交平台發文表達不捨之情。阿澤認為生命無常，叫大家活在當下。而阿田就話Momo個樣好似好惡，實情就係好甜好嗲人嘅女仔，無論爸爸媽媽做到幾夜返屋企，佢都會喺門口等佢哋，迎接回家。
周慧敏愛貓如命
愛貓如命嘅 Vivian 養過七隻貓，更曾為愛貓出書，推出《 我的貓兒子周慧
豹 》記錄人與貓嘅生活點滴。陪伴佢十七年嘅阿豹去世後，老公倪震為佢
帶來新主子豬皮、BB，原來佢哋同阿豹都有血緣關係。
袁文傑願以自己時間延續愛貓生命
袁文傑養咗兩隻異國短毛貓「囡囡」和「囝仔 」。2011年「 囡囡 」離世，去年「 囝仔 」十歲生日，佢話希望以自己嘅時間延續愛貓嘅生命。原來「 囝仔 」確診患癌後，接受長達九個月嘅化療，去年八月終敵不過癌病離世。轉眼一年過去，袁文傑至今仍將「囝仔」嘅貓砂盆留在家中。
薛凱琪靠愛貓治抑鬱
2008年患上抑鬱症嘅薛凱琪，翌年獲好友梁祖堯贈送摺耳貓 Ponyo，Fiona 話大部分時間都花喺照顧 Ponyo 上，令病情得以紓緩。與貓結下不解之緣，有晚深夜完成錄音，經過巴士站時遇到被遺棄嘅兩隻初生貓咪，Fiona 將佢哋一併「 打包 」，取名 Tissue 和暖暖，後來 Tissue 因先天性心臟病離世，Fiona 憑歌寄意，創作〈 復原 〉一曲悼念愛貓。
唐詩詠打開雪櫃見到愛貓
貓奴唐詩詠本身有兩隻貓，今年年初迎來新成員蛋蛋。小貓初來報到，就發生咗一段小插曲，話說Natalie諗住煮隻蛋嚟食，點知打開雪櫃，竟然見到蛋蛋用屁股背向著佢，坐喺大堆食物中，仲起勢咁擺尾，笑到佢肚痛！
傅嘉莉愛貓屬鐵漢柔情
家中養有兩隻貓，相中灰白色叫Bebe，貓女就叫Gebe，兩隻都十多歲了。傅嘉莉話Bebe樣好cool，但把聲好嗲，呢啲叫鐵漢柔情，所以我啲朋友都會叫佢做青雲。
莊韻澄領養八隻貓
前名莊端兒嘅莊韻澄，領養咗八隻貓，包括一歲半布偶貓Galaxy、十歲英國短毛貓Miumiu、唐貓Lily同七歲唐貓蕉蕉等。莊韻澄每次做瑜伽直播時，多管閒事嘅主子們都一定會入鏡，相當搞笑！