【帶你睇樓】王祖藍千呎屋五臟俱全　囡囡遊戲區最窩心

藝人王祖藍近日亮相內地綜藝節目《做家務的男人》展現暖男一面，更令家居環境曝光，節目中祖藍太太李亞男就擔任導遊，帶大家嚟個Room tour！見佢哋屋企以白色為主，設計簡約、優雅，一入屋設有玄關加小型走廊位置，轉角後仲有超大型客應連飯廳，空間感十足。

客廳放有三座位L型梳化，仲有大量空間作為囡囡Gabrielle嘅遊戲區，旁邊設有盆栽區，仲有大型儲物架，擺放大大小小嘅飾物及多張家庭照，而去到飯廳位置，牆上仲印上一大幅結婚相，認真溫馨！

至於廚房，雖然L型設計並唔算非常闊落，但都有多個廚櫃，兼足夠位置放到焗爐、雪櫃、兩個爐頭、兩個鋅盆及多樣煮食用具，可以話係五臟俱全。房間方面，囡囡房放滿兒童書籍，而主人房則有衣帽間，並且除咗雙人床外，更有充足空間放得落畀囡囡玩嘅小屋，目測全屋面積至少過千呎！

東網網站 : https://on.cc/

東網Facebook專頁 : https://www.facebook.com/onccnews/