古天樂與姜皓文在新片《犯罪現場》中，有一場在佐敦鬧市實境拍攝的重頭戲「珠寶金行搶劫」非常矚目，劇組耗資7位數（以百萬計）搭建「利生珠寶行」，更封鎖馬路狂奔部分佐敦道及彌敦道進行拍攝，相當大陣仗。
這場重頭戲講述古天樂飾演的劫匪汪新元，聯同同黨凌文龍、李璨琛、吳浩康及張松枝到「利生珠寶行」打劫，飾演警察的姜皓文帶領顏卓靈、徐廣林等警員追捕，繼而產生一系列懸疑事件。拍慣槍戰、動作片經驗豐富的古仔說：「好多時我哋拍戲都係借個廠景，好少懸疑警匪片真係喺香港鬧市取景，但我哋今次真係租咗個舖位，實境搭咗間珠寶店出嚟。個場戲好大，講好多差人追捕，劫匪點樣喺珠寶行打劫，同埋事後點樣離開，我覺得個感覺好真實，震撼性好大！」問到拍攝的難處？古仔說：「拍攝珠寶行要爭取時間，因為涉及街燈，晚上12點過後，街道好多街燈、霓紅燈都會關上。另外，很多景要封街拍攝，要拍好多警車，拍警員跑幾條街集合，仲要開好多槍，拍嗰晚都引起咗啲恐慌，大家都真係以為有人打劫，我個角色要揸支機關槍係咁掃射，感覺比較少有，其實我拍片以來，好少有喺香港鬧市拍一場咁真實性嘅槍戰戲！」
美術組搭景落足心機，令不少人都以為場內的珠寶都是真，連姜皓文（黑仔）對幾可亂真的金行表示：「真係唔係誇口，我哋啲道具、陳設、搭景相當之神乎奇技，竟然我哋搭咗個珠寶行出嚟，有兩個遊客走入嚟想買珠寶，我哋同佢哋講話係拍戲，佢哋話『嘩！乜整到咁真！』！我好少喺香港揸車咁瘋狂，第一次咁大個仔係佐敦道開對頭車，仲要開槍！」首次飾演女警的顏卓靈（Cherry）亦表現雀躍說：「除了初嘗開槍滋味外，還有一場為了追捕賊人在彌敦道及佐敦道十字大馬路間拔足狂奔的戲，自己一邊拍都覺得好緊張。珠寶行入面開晒機關槍，又有煙霧彈，又爆晒玻璃，其實開頭我好驚，但一爆完之後就發現好安全，劇組會好睇住演員，一拍完導演馬上問大家：『有冇事有冇事？』跌落嚟嘅玻璃碎全部都係膠，其實係好safe，我就好enjoy喇！完全唔使任何幻想力就可以好代入拍攝，包括望住嘅途人無論用睇拍戲定真係以為出事嘅心態都好，都好營造到件事！」