現年34歲嘅「沈大師」沈卓盈(Jess)早前離巢無綫,估唔到昨日就宣佈婚訊,仲公開同老公Calvin嘅甜蜜婚照㖭!一眾網民得知喜訊後紛紛送上祝福,也有人認為走性感路線的Jess樣靚身材好,仲有對超長美腿,婚後為配合丈夫低調作風而減少現身幕前,大歎可惜呢!回顧沈卓盈的情史,入行以來當然不乏裙下之臣,但她的擇偶條件也頗高,幾位前男友幾乎都是非富則貴,外界認定她是「釣金龜」,對此﹐Jess去年初接受本刊訪問也為自己平反!
撰文:東方新地 |圖片:沈卓盈IG、新傳媒圖片、無綫電視截圖
34歲沈卓盈 宣佈婚訊
沈卓盈喺IG上載婚紗照並留言:「從不期望驚天動地的愛情,只求細水長流的甜蜜。不知不覺間原來我們的緣份源於十年前的一面,可是種子並沒有在那一刻萌芽。猶幸上帝的安排、緣份的牽引,令我們在四年前的那一天再次重遇,讓彼此加深了解,一起學習,一起成長,再一同走向人生的新一頁,成為相依相伴的伴侶。❤」
據知二人喺上年年尾去咗巴黎和英國影結婚相,當然唔少得喺巴黎鐵塔下留倩影,非常浪漫!
沈卓盈接受傳媒訪問透露Calvin上年年中求婚,過程開心又浪漫!而佢好鍾意法國及英國,所以婚照都喺呢兩個地方影,佢仲話暫時以工作為先,對生BB佢話講緣份。
Cover Girl選舉奪冠入行
沈卓盈02年參加無綫第四屆「《TVB周刊》Cover Girl選舉」奪冠入行,雖然多年來不乏演出及做主持的機會,但多被派以演花瓶、狐狸精的角色,代表作欠奉!
早年沈卓盈都有份影TVB月曆,佢同一眾小花、小生影水著相!
09年《古靈精探B》大跳鋼管舞
「沈大師」沈卓盈喺劇集《古靈精探B》有鋼管舞演出,動作較簡單,勝在夠火辣性感,播出期間成為一時熱話。
她曾參演TVB劇集包括《結·分@謊情式》、《衝上雲霄II》等。
沈卓盈: 我唔使靠托!
早年,沈卓盈出席各大活動頻頻作性感打扮,露腿又拋胸,因而被封「新咪神」,外界更把她和「咪神」高海寧比較,不過沈大師當時表示:「我唔使靠托!」真材實料又堅挺咁話!
沈卓盈雖然成日作性感打扮頻晒胸,但佢一對白滑長腿才是標誌!
現年34歲「沈大師」沈卓盈於去年底約滿離巢大台,告別工作了16年的無綫。
入行前做兼職模特兒的沈卓盈,由唔識化妝到現在女人味出晒嚟,其玲瓏浮凸身材更是得天獨厚。
沈卓盈聲稱被非禮
33C沈卓盈早年在微博自爆遭旺角一名跌打醫生鹹豬手,佢話個醫生都好多圈中人幫襯,估唔到做出咁下流嘅签為,事後佢喺TVB經理人陪同下到旺角警署報案!
約徐淑敏行名店
Jess同徐淑敏因為合作主持《最緊要正字》而成好友,兩個女仔成日被影到收工後一齊唱K行名店,徐淑敏嫁黃浩後,都不時約埋一齊行名店!
擇偶條件高 被指釣金龜
34歲的沈卓盈擁有女人夢寐以求的S形身材,回顧佢嘅情史,先後戀上飛機師Simon,以及楊秀惠舊愛、金融才俊麥偉汶(Ray),到之後同家族經營內衣出口生意嘅富商Calvin拍拖,多年來外界指Jess舊愛全是非富則貴,擇偶條件甚好高,無寶不落!
沈卓盈為自己平反
沈卓盈否認釣金龜,之前佢接受本刊訪問時話要為自己平反:「拍拖好正常,係每個人生活嘅一部分,只係外界經常過分放大我嘅感情生活,忽略咗我都有畀心機工作,演好每一部劇。我啲家姐24歲就結婚生仔,所以我自小就對愛情有憧憬,曾經渴望22至24歲就嫁人,希望有個幸福家庭,但依家我覺得緣份最重要,有啱嘅人我會試,唔得亦唔會勉強。」
男友Calvin家族從事內衣生意,對住男友甚有原則的沈卓盈打開幸福之門。她說:「現階段我同男友都有共識,行到最後一步就睇時機,佢求婚我先諗啦!女人幾叻都好,最終都係要搵個好歸宿support自己。男友已經去到一個地步唔需要經我就約我啲家姐食飯,連我3歲嘅姨甥女都好鍾意佢,搞到我呷醋。」
少婦聯盟由來
電視圈近年女團當道,早年有佘詩曼為首的「七魔女」,後有胡杏兒領軍的「胡說八道會」,近年陳凱琳(Grace)、龔嘉欣(Katy)、譚凱琪(Zoie)、沈卓盈(Jessie)合組嘅「少婦聯盟」,當初組成嘅時候四個成員都未婚,當中陳凱琳與龔嘉欣三十歲都未到,何解會叫自己少婦?其實源自她們合作的無綫民初劇《平安谷之詭谷傳說》,四人在劇中都已嫁作人婦,在封建傳統社會欺壓下團結起來反抗。私底下四人一拍即合,圍內又講啲師奶嘢,所以美其名叫「少婦」,眾人開了WhatsApp Group分享邊度有減價,邊度有著數,仲會約埋一齊去百貨公司shopping。唔止少婦,其實仲好師奶。
四女喺戲裡戲外更成為好友,friend到成立閨蜜團「少婦聯盟」,佢哋近排喜事重重,繼之前陳凱琳添丁,依家到沈卓盈結婚,相信喜事隆續有來,恭喜晒喇!