今季降班嘅李斯特城，陣中唔少球員約滿離隊，亦有球員轉投別隊，熱刺今日官方宣布以4000萬鎊+1000萬鎊浮動條款購入李斯特城攻擊中場球員麥迪臣(James Maddison)，雙方將會簽約5年至2028年，李斯特城核心正式離隊。
現年26歲嘅麥迪臣效力李斯特城5季，期間為球隊上陣203場攻入53球及交出44次助攻，協助球隊拿下足總盃冠軍同贏下社區盾，今季即使未能力挽狂瀾阻止李城降班，個人係英超亦交出10球9助攻嘅亮麗數據，數據上自2018年起，係創造機會上佢只係僅次於曼城嘅迪布尼同紅軍嘅阿諾，而射門數字上亦只係排係沙拿、簡尼同孫仔之後，可見麥迪臣嘅能力同創造力。加盟熱刺後，麥迪臣或會係「新肥普」嘅帶領擔任4-3-3陣式嘅8號位，增添自由度同後上組織、突入嘅作用，今季嘅熱刺3-4-2-1陣式正正係中場缺乏創造力，中場兩位工兵無力支援哈利簡尼先令佢成為「悲劇英雄」，來季有麥迪臣來投除左有助組織，左翼嘅孫興慜亦有望可以沿住邊線放心突破，重拾前季嘅風采～
對於麥迪臣加盟熱刺，唔少球迷都嘆言麥迪臣球員生涯已完、應該加盟紐卡素，版主起初亦有相同嘅感受，麥迪臣嘅能力值得參戰歐聯，值得贏下更多贏盃，值得再上一層樓成為英軍嘅常規主力，然而轉會並不是一買一賣嘅事情，球員除左係綠茵場上面對新挑戰，場下亦要面對移居適應嘅問題，更牽涉一個家庭嘅居住地，麥迪臣嘅兒子啱啱出世，比起北部嘅紐卡素，倫敦嘅天氣同治安也許較為適合安家。此外，據報係今次轉會熱刺主席利維積極推動轉會事宜，甚至球員效力高雲地時期，利維已經對麥迪臣有興趣，因此麥迪臣加盟熱刺唯有祝佢好運，並係熱刺繼續發光發亮🥹
回想起當日贏下足總盃麥迪臣拉住主席Khun Top一齊高歌慶祝，當日歐協聯八強激情反勝飛燕諾晉級，轉眼間愛隊亦已經離開英超數月，愛將麥迪臣亦已官宣離隊，7位李城球員約滿離隊，一隊成員開始變得面目全非，時間一點一滴流逝，昔日戰友亦先後離去，雖然當日賽場上展現嘅激情不再，但力撐球隊嘅心仍在，李斯特城來季要加油🦊
Follow 足球港場 IG
https://www.instagram.com/footballarena_hk/