跑畢倫敦馬拉松即重返商台做節目 林海峰感謝在英港人：其實係互相打氣

（獨媒報導）林海峰日前到英國參與倫敦馬拉松，沿途獲大批在英港人打氣加油。他今早重返商台，主持叱咤903節目《在晴朗的一天出發》，開咪感謝在英港人的打氣，認為對方叫「林狗加油」，其實是互相打氣，指自己每早做節目正是啦啦隊的角色，為在英港人的聽眾打氣加油；又指「我以為我跑緊香港馬拉松，全部講廣東話」。

原定下周一復工 跑步期間被喚「返去做晴朗啦你」

「林公子」最後以3小時18分08秒完成賽事，他昨日下午已到港，指受惠「0+3」入境檢疫措施能夠立刻回家及上班。林海峰原定下周一才復工，「諗下係咪應該享受埋假期呢，諗諗下都係唔得⋯⋯跑緊嘅時候，突然間有個嗌『返去做晴朗啦你』。」

說到這裡，林海峰有感而發：「佢可能係嗌晴朗，咁佢係咪嗌晴朗呢？我覺得未必係，佢可能嗌903，諗諗下未必嗌903，再放大少少⋯⋯其實『我哋』係代號嚟。」他最後想到，對方其實可能是叫「香港加油」，即對於某個地方的關係所投射的問候。

圖片來源：叱咤903 在晴朗的一天出發 Facebook

林海峰笑言想攬下支持者 「但我趕時間」

在跑馬拉松期間，林海峰對支持者展示心心、致敬、拳頭及合十雙手，笑言不斷遭途人用廣東話大叫自己的名字，「我以為我跑緊香港馬拉松，全部講廣東話」。另有一名粉絲更手持黑膠碟的封套，亦有年輕夫婦喚自己加油，「幾K就有人嗌一嗌⋯⋯我真係想停低，行埋去攬下佢『你點呀』，我真係想咁，但我趕時間。」

圖片來源：叱咤903 在晴朗的一天出發 Facebook

在節目中，林海峰亦真情流露，表示必須立刻回港開咪講述當日情況，「我一定要返嚟即刻講，對住個收音機支咪講，然之後等去嗰啲人聽到。」他深思後指對方叫「林狗加油」，實情是互相打氣，自己每早做節目正是啦啦隊的角色，同時為英國聽眾打氣加油。

三名903《晴朗》主持林海峰、阮子健及盧覓雪早前曾遭黨媒點名，指控散播反政府及憎恨中央及特區政府的言論。林海峰今早在節目中便笑言，「其實我好唔想自己鍾意自己份工作，我時時想每一日討厭都快啲討厭我嘅工作，然之後快啲離開，但有陣時發生啲嘢令你覺得好想返工，同啲人講多謝你哋有聽晴朗。」

圖片來源：叱咤903 在晴朗的一天出發 Facebook

與在英朋友聚會 甫見面即擁抱

另外，林海峰透露與數名在英的朋友聚會，「大家一見面就擁抱，擁抱都維持幾秒以上」，聆聽對方講述日常趣事，感受到生活愉快。他亦觀看了上周六的英超賽事，即阿仙奴對熱刺的北倫敦打吡，將場刊送給另一主持、阿仙奴球迷盧覓雪，並將跑馬拉松的制服、茶葉和餅乾等送給聽眾。

圖片來源：林海峰Facebook

本身是藝人兼歌手的林海峰今年曾推出歌曲《蛋撻》，以離別角度講述香港味道及本地情懷。林海峰在節目中再次提到，港人「返鄉下」到日本只會玩買食，但真正「返鄉下」應是探望親友，「見親人或者身邊嘅人，同佢講下你生活點，聽下佢講佢嘅生活點，嚟個擁抱⋯⋯咁為之『探親返鄉下』。」