愛華頓嘅天之驕子安東尼哥頓，紐卡素、車路士喺上個夏天都向被問過價，當時講緊係£60M。世界盃後不受重用，只得1場正選，更有3場比賽冇上陣，加上連續三日缺操，明顯係離隊先兆。而家喺冬季轉會窗再受紐卡素青睞，以£40M+5M嘅價格轉會，離開母隊。
高達£20M嘅轉會費跌幅，當然同臨近轉會死線及球員意願有關，但事實上，哥頓今季重要嘅好多數據都有下跌，特別係「 創造射門機會」呢一項。據fbref嘅統計，數據除開90分鐘，哥頓上一季有3.03次創造射門機會，係英超翼鋒裏面排行最好嘅30%。呢個數據今季下跌到1.89，係英超翼鋒最差嗰5%，兩季之間差天共地。
不過又唔可以賴哂佢，愛華頓進攻失靈，甚至哥頓偶爾要打偽九號，亦直接減低咗佢創造射門機會嘅數字。而數據嘅嘢有負有正，哥頓今季喺搶斷、射門次數嘅提升亦值得一提，不過呢個係源於愛華頓整體實力下降，令哥頓要喺陣式前後都要作更多貢獻。當中，勤力嘅防守，係衡量哥頓價值的重要一環。直接拎紐卡素右翼阿米朗嚟做對比，哥頓喺搶斷、封阻等等嘅平均90分鐘數據，都比阿米朗更加優勝。
然而，上述啲數據嘅缺陷之處，在於紐卡素中場防守遠比愛華頓強，而哥頓喺愛華頓本身就係一個防守重將，佢嘅個人防守數據樣本自然會增加。
哥頓唔算係主導攻勢嘅球員，以速度同跑動量見稱，佢嘅存在為球隊邊路增添唔少活力，比起擔正進攻大旗，作為攻防兩端嘅副手，係更加適合佢嘅角色定位。而皮球過三閘線後，佢亦會開始脫離右路，喺球場唔同位置遊走，以不斷嘅跑動嚟拉開對方防守陣式嘅空位。哥頓每90分鐘平均衝刺次數超過20次，係愛華頓隊內最高，而佢亦增經係英超今季創下過最高速衝刺速度嘅球員（36.61km/h），直至車路士嘅梅迪歷來投後先至被打破。
喺愛華頓主打右翼或偽九號，但佢左右都踢得，嚟到紐卡素，預計會先佔一席左翼正選，以及喺阿米朗缺態/輪休嘅時候踢返右翼。雖然哥頓喺右路有更好嘅創造能力，但佢有中龍嘅嘅射門，大部份都係喺禁區內偏左位置起腳。
嚟到紐卡素，鑑於左閘係由中堅客串嘅高佬丹般，如果由哥頓打左翼，佢可以喺防守嘅時候多啲回撤，比丹般收入到中堅位置，令紐卡素可以擺出更闊嘅防守陣式，嚴防對手拉邊嘅戰術。加上右路出波有查比亞，而阿米朗都會靠近門前，令哥頓可以主導球隊左路中、後線之間嘅進攻，喺呢度尋找自己嘅新定位。