39歲的陳自瑤（YoYo）入行16年，星途平平，今年在劇集《那些我愛過的人》飾演「錢莉媛」彈起，演技被受讚賞，一幕水著出鏡，大晒超索身形，立即成為焦點，被讚身形多年不變﹗今日陳自瑤在社交網晒中學學生照，獲網民大讚冇變樣，臉上未有留下歲月痕跡，令人驚訝又羨慕﹗
撰文：東方新地 ｜圖：陳自瑤IG、李若彤微博
入行16年凍齡索媽
模特兒出身的陳自瑤，04年加入無綫拍攝《赤沙印記@四葉草2》而為人認識，當年23歲的陳自瑤仍然一臉稚氣，當時更在「最美四葉女」選舉中排名第三，僅僅屈居於唐詩詠及龔嘉欣。23歲入行的陳自瑤，家庭觀眾睇住佢大，睇住佢變作人妻人母，不經不覺原來已快四張嘢﹗今日陳自瑤在社交網貼出中學學生相並寫道「你好，久違了的自己﹗ 」網民紛紛按讚留言「天生麗質，咁多年都可以唔變」、「證明冇入過廠、冇整過容」、「由細靚到大、點解可以冇變過？」、「同依家一樣」、「一定係校花」、「依家再著番套校服影張學生相應該都係一樣樣」。
李若彤純情無邪有仙氣
無論拍電視、電影甚至MV，總有女星被安排著起校服扮學生妹，不過化行妝set晒頭，容貌經過歲月洗禮，哪有真正學生時代一襲校服look來得更pure更true？近日54歲李若彤，就帶頭著番套真‧校服證明四十年過去，身材依然fit到漏仲著得到！抗疫期間日日操肌操出腹肌馬甲線，54歲李若彤近日因上內地節目而穿回中學校服look，以證家陣身材仲 fit 過當年，不過論純情無邪有仙氣，當然係呢張泛黃舊相裡面嘅少女姑姑最迷人。
李佳芯校花格
雖然喺《 踩過界 》同《 BB 來了 》都為套戲著過校服，不過三十幾歲化行妝，又點夠十幾歲脂粉不施嘅真 ‧ 學生相嚟，一睇就知係校花格！
齊蔭胡杏兒夠可愛
如今係兩子之母嘅杏兒，都po咗自己張小學校服相緬懷過去，齊蔭嘅杏兒非常可愛，樣貌輪廓其實跟現在沒有多大分別，證實佢肯定冇整過容。
黃智雯靚女又有性格
入行13年，愈嚟愈好戲愈睇愈順眼嘅黃智雯，當年紮起孖辮嘅小學生 look 精靈過人，原來細細個已經好靚女又有性格！
江嘉敏高抄selfie
作為電視台後生一輩最多緋聞、公認最強電力嘅小花，江嘉敏學生時代已經參加校花校草選舉、識得高抄selfie突出大眼又顯瘦，細細個已經好進取。
鄧紫棋金魚嘴多年不變
小學拍過教育電視，中學又參加學屆歌唱比賽所向披靡，原則上大家睇住16歲入行嘅G.E.M.大，金魚嘴多年不變。
吳若希愈大愈瘦靚愈
有呢張中學相對比，就見到今時今日已經生咗一仔一女，為人母亦為人妻嘅吳若希，愈大愈靚愈大愈瘦，連曾經嘅個人標誌包包面都唔覺唔覺消失埋！
黃翠如正經女班長格
學生時代接受過香港電台《鏗鏘集》訪問，所以個真實學生look一早喺網上流傳，翠如BB十幾歲時斯斯文文又一本正經，完全係女班長格！
馮盈盈四眼學生妹
敢做敢當又敢言嘅馮盈盈，學生時期已經眼大大面尖尖，不過就被副眼鏡掩蓋咗個靚樣，只係一個普通四眼學生妹。
劉佩玥迷倒唔少男同學
出身於沙田名校浸信會呂明才中學，劉佩玥十年前嘅運動會look最易認就係個招牌笑容，當年應該迷倒唔少男同學。
湯怡黑面學生相
33歲湯怡喺《 反黑路人甲 》同兩年前青春片《 某日某月 》都試過扮學生妹，更被網友盛讚 keep 得好零違和，原來真正學生年代嘅湯怡皮膚黑黑板起面孔，好 cool 啫！
蔣家旻稚嫩少女
眨吓眼「 馬子妮 」蔣家旻都已經三十歲，好似天生麗質少女味仲喺度，其實對比番張真實學生相，就知十幾歲呢啲先至係真正嘅稚嫩少女。
王灝兒有霸氣又有性格
一樣係由細唱歌唱到大，學生年代已經喺歌唱比賽同G.E.M.交過無數次手，見慣大場面嘅JW細細個已經有霸氣又有性格。
阮小儀歲月不留痕
真正歲月不留痕，keep得非常好嘅仲有阮小儀，三十幾年前中學年代個學生 look，根本同上月剛滿50歲嘅最新造型冇分別！
糖妹招牌大眼同酒窩
入行咁耐都係 keep 住留齊蔭，難得見到糖妹露出額頭嘅，竟然係中學時期張校服相，其實無論齊蔭定露額，招牌大眼同酒窩都仲喺度，一樣咁可愛。
