屯門公園兒童遊樂場翻新過後，設施新淨、安全又好玩。戶外有齊跑跑跳跳嘅玩樂設施、室內有得親親小動物，最重要仲要係免費入場嘅，夠曬我哋同小朋友，放電兩三小時。Blogger「泥圍爸爸的育兒時光」近日帶著孩子到屯門公園玩，即睇分享！
撰文及圖片授權：泥圍爸爸的育兒時光 ｜編輯：TLY
屯門公園放電玩樂設施
最近去咗一個好唔錯嘅遊樂場，戶外兒童樂園部分，一入去有啲高高低低嘅小山丘、彈床、敲擊樂器及鼓。
屯門公園特色滑梯
沿途仲見到有噴水花花裝置，不過當日無開到。我哋同呀仔彈左一輪，再行入啲竟然有座目測兩層樓高嘅攀爬塔同滑梯，都係近年少見既設施。當然如果想安全啲嘅，場內仲有另外4條滑梯可以瀡，當中更有一條係我童年時代玩嘅「滾筒式滑梯」。
屯門公園鞦韆設施
不過，最最最吸引我注意嘅係鞦韆設施，記得以前既傳統鞦韆，安全意識 唔太高，但勝在夠好玩。呢度一樣搵到幾種唔同嘅鞦韆，包括：雙人親子型、座椅型(有安全帶，似Car Seat)同搖籃型，玩曬三種，真係樂而忘返。我諗唔止係小朋友，大人見到都覺得好好玩，因為可以「重拾昨天，樂趣一堆」，同童年玩嘅玩樂設施不相伯仲。
室內爬蟲館
玩完室外，原來仲有個室內爬蟲館。館內地方其實唔係好大，但入面養咗好多平時少見嘅爬蟲類，例如：手臂禁粗嘅氈蟒同球蟒、大過隻鑊嘅盾臂龜，仲有啲真係一路都未見過嘅蜥蜴同蠑螈，真心值得一睇，令大人細路都大開眼界。溫馨提示你，爬蟲館冷氣都幾凍，去室外玩完，記得同小朋友抹汗同洗洗手！
總括嚟講，室內同室外同樣好玩，係一個有誠意嘅玩樂設施！可以再去！
屯門公園
地址：屯門西鐵站旁（在屯門西鐵站B出口步行約十分鐘經公園便可到達遊樂場）（顯示地圖）
如果係其他地區嚟既，可以參考康文署網頁（https://www.lcsd.gov.hk/tc/parks/tmp/access.html）。
開放時間如下：
兒童遊樂場：每日上午7時至下午11時（包括公眾假期）
爬蟲館：每日上午9時至下午6時（包括公眾假期）
每星期一上午7時至下午1時暫停開放，以便進行場地保養工作。
（如星期一為公眾假期，保養工作將順延至下一個工作天進行）