股票投資市場上，個個都鍾意買「平貨」，究竟一隻股票點為之係平/貴？係咪股價愈低就一定愈抵買？今課《熊大理財教室》就會同大家講解市盈率（PE：Price-to-earnings ratio）、市帳率（PB：Price-to-book ratio）呢兩個入市指標。
兔兔：熊大，股票A現價10元，股票B現價20元，係咪代表股票A抵買過股票B？
熊大：表面上股票A的價格低過股票B，但投資角度上，要睇埋間公司的內在價值同盈利能力，先至可以判斷到隻股票係平抑或貴。最基本的指標可以睇PE、PB。PE係市盈率，即「股價除以每股盈利」得出的比率，可比較其市價同公司盈利之間的關係。
熊大舉例說：例如公司A股價10元，每股盈利1元，咁PE就係10；公司B股價都係10元，每股盈利2元，PE就係5。兩者相比之下，兔兔你覺得邊隻抵買？
兔兔：好似公司B比較吸引，因為同一股價但賺的錢較多，即係意味回本期比較短。
熊大：PE低意味了股價低的同時但盈利高，感覺上比較抵買。
熊大：咁又唔係喎。你睇吓騰訊（700），PE一直好高，但高極都仲有人鍾意買。PE高的公司表面上股價貴，但同時亦意味市場預期未來盈利增長高，即係大家睇好呢隻股票，會用較高價去買佢嘅股份。之但係如果個估值太高，又會存在一定的風險。
兔兔：即係如果用PE去比較兩隻股票，要考慮到佢地屬於咩行業？
熊大：係呀。利用PE去比較不同股票的投資價值時，佢地最好屬同一個行業。因為同行業的每股收益會比較接近，比較起來先會容易分辨出平抑或貴。好似頭先提到的騰訊，屬於科技股，呢個行業增長性強，市場通常會畀佢溢價。如果將騰訊同一隻公用股比較，公用股的增長性較慢，溢價較低，PE一定會低。如果只以市盈率的高低作比較，投資者就好自然揀公用股，而唔揀騰訊。
兔兔：咁點解行業增長勁，市場就會畀佢溢價？
熊大：如果公司A每股盈利增長預測由1元增加到4元，相反公司B的每股盈利預測冇增長，維持喺2元。而目前兩者股價都係10元，股價不變的情況下，公司A的PE就會大幅下降，由10倍跌至2.5倍，而公司B的PE就一樣都係5倍。換言之，呢個情況下公司A就會變得更加抵買。
兔兔：咁咩係PB？
熊大：PB係市帳率，係「股價除以每股淨資產」得出的比率，代表以公司會計帳面價值來衡量其股價。而淨資產係將資產負債表中的「資產減去負債」得出來的。
兔兔：PB的高低又反映咩？
熊大：當PB=1時，意味市場願意用同等的價錢買入間公司所擁有的淨資產；當PB>1時，即股價對淨資產有溢價，表示公司可能被高估，或者市場預期資產有增長；當PB<1時，即股價較資產淨值低，表示股價可能被低估、或市場預期資產會下跌。
熊大繼續說：不過PB唔係所有企業都啱用，佢比較適用於重資產的公司，如保險、銀行、地產行業等，其股價較接近資產淨值。而一些輕資產的公司，如科技、服務業等，股價較偏離資產淨值，PB就唔係好啱佢地去比較。或者可以參考間公司過往的PB，如果佢嘅股價接近PB歷史低位，就可以考慮係咪時候進場。
兔兔：好！等我今晚返去做吓功課，睇吓邊隻恒指成份股的PE、PB最吸引先。
