肯德基、麥當勞，一對近半世紀嘅老對手
香港人嘅生活節奏快，有時忙起上嚟，邊有時間坐低飲啖茶食個包，所以唔少人都好鍾意食啲又平又快又方便嘅快餐。講起快餐，唔少人就會即刻諗起肯德基同麥當勞，無他嘅，佢哋兩間喺香港深耕咗近半個世紀，陪伴住好多市民成長！佢哋一間賣「雞」，一間賣「漢堡」，主打嘅招牌品項唔係好同，但其實係一對競爭咗好耐嘅「老對手」喇。而係最近，佢哋嘅「戰鬥」好似升咗個level，擺明車馬針住對方熱門嘢食嚟挑機！今日就等DailyView用大數據同你哋淺談肯德基同麥當勞今年嘅爭鬥史啦！
DV小教室：網路溫度計透過《KEYPO大數據關鍵引擎》，觀測、爬梳港澳地區近萬個網站、頻道，其中包括新聞頻道、各大討論區、FB、IG以及Blog，從中取得資料樣本數，並以AI語意程式作數據分析。「網路熱度」為主題項目相關的網路posts和comments ，數值愈大代表主題項目的討論度愈高。
食雞定食漢堡包？
以總體銷售額嚟睇，麥當勞同肯德基就係全球頭一二嘅餐飲連鎖企業，佢哋之間嘅「鬥爭」喺世界各地不斷發生，各國嘅民眾都看在眼裡，更會積極地將兩者擺埋一齊比較。依層香港都唔例外，KFC早喺1973年喺香港開過鋪頭，經營到1975年麥當勞正式進入香港市場之後就撤出，好多人都話當年KFC係俾麥當勞「打走」。直到1985年，KFC先再度有人代理經營，再次引入返嚟香港。
依對「老對手」競爭咗咁耐，其實戰果係點樣？我哋以《KEYPO大數據關鍵引擎》分析吓佢哋兩家嘅招牌品項嘅大數據，即係KFC嘅「雞」同麥當勞嘅「漢堡」。睇返圖表，可以見到今年網路上討論肯德基嘅「雞」同麥當勞嘅「漢堡」熱度相當高，其中以肯德基嘅「雞」略勝一籌。但佢哋競爭嘅嘢早就唔止自己嘅招牌嘢食，佢哋好多產品都只係差一個字咁大把，擺到明係想同對方鬥過，而到咗今年仲升級咗，直頭出埋對家熱門產品嚟挑機！
Images Source:《KEYPO大數據關鍵引擎》
產品個名只係差一個字！
巴辣雞腿包（30筆）
肯德基云云眾「雞」當中有兩隻包最為出名，其中一個就係「巴辣雞腿包」。呢隻包同麥當勞嘅「脆辣雞腿包」只係差左一隻字，兩隻包睇落都係差唔多，巴辣雞腿包仲多番一塊厚切番茄添，但係相較麥當勞既脆辣雞腿包，點解巴辣雞腿包都係冇咁出名？網民就話，佢哋去得KFC就係想食雞，一係就食個葡塔或者蘑菇飯，呢個包好似雞肋左d喎！
image source:
脆辣雞腿飽（662筆）
麥當勞主打嘅嘢食一直都係漢堡包，而係其中咁多包入面，「脆辣雞腿飽」一直好受香港人鍾意。佢藉辣辣地又有沙律醬嘅口味突圍而出，加上做咗「特價餐」咁多年，收獲到唔少忠實FANS。今年m記仲推出成個「脆辣雞腿飽」系列，又加菠蘿又double咁，有冇做多咗就唔評論啦，佢嘅網路討論度贏「巴辣雞腿包」幾條街就係事實囉。
image source:
巴辣香雞翼（232筆）
「行快啲啦！飛機唔等人㗎！」「肯德基啊！食件巴辣香雞翼先啦！」唔知大家仲記唔記得依個經典廣告呢？過咗咁耐喇！「巴辣香雞翼」依然係KFC嘅熱門小食，唔少人想嘆個下午茶，都會去諗到「食件巴辣香雞翼先」，加多杯可樂，就真係啱啱好啊！
image source:
巴東辣雞翼（137筆）
「巴東辣雞翼」最近就同「脆辣雞腿包」系列一齊推出，個名差KFC「巴辣香雞翼」一個字咁大把，好似真係想追擊KFC咁。經過網民試食，話隻雞翼嘅東南亞香料味重，辣辣地又帶有啲好似薑咁嘅味道，唔多討好，話下次都係食返脆香雞翼算喎。
image source:
戰鬥升級！向對方熱門產品挑機
KFC炸雞（7915筆）
去親KFC就梗係為咗「食雞」㗎啦！KFC咁多年嚟，除咗聞名中外嘅「家鄉雞」之外，仲主力推出各樣口味嘅「雞」，炸嘅、烤嘅、錫紙包嘅……真係咩花款都玩齊。就好似KFC句經典slogan一樣：「 We do chicken right」，做「雞」佢哋真係霸主級人馬。最近麥當勞要叉隻腳嚟出炸雞，挑釁程度不下喺機鋪擺低一蚊，KFC要點樣面對呢？真係成地花生啊！
image source:
麥炸雞（3829筆）
麥當勞11月尾推出嘅炸雞超新星「麥炸雞」，一聽依個名就已經感覺到挑釁嘅意味！麥當勞由漢堡界踏足炸雞界，似乎要向炸雞霸主落戰帖？麥當勞自稱依隻「麥炸雞」係可以超越脆香雞翼嘅成就，好多網民試過就話根本同脆香雞翼一樣味，只不過係大隻咗咁，仲要冇泰式辣醬。好味係好味，但係撞晒味咁點算啊？不如學KFC咁時不時出新口味囉。
image source:
上校雞寶（973筆）
KFC「雞寶」好多地方都有賣開，好似中國就一早賣到出晒名，不過香港地「麥樂雞」形象深入民心，咁「上校雞寶」要點賣法呢？話說KFC都算有新意，麥當勞大賣「麥炸雞」廣告嘅時候，KFC順手宣傳自己「上校雞寶」，向消費者推出優惠，話喺11月30日到12月5日11點後買6件或9件雞寶，同店員大聲嗌「肯樂雞」就可以享有優惠。唔知市民嗌嗌吓會唔會慣呢？
image source:
麥樂雞（1791筆）
講起麥當勞經典品項就不得不提麥樂雞，麥當勞嘅麥樂雞咁多年嚟形象已經深入民心，就連喺超市買嘅雞塊，我地都會習慣叫佢做麥樂雞，可以講話「麥樂雞」幾乎已經變成「雞塊」嘅代名詞。喺雞塊呢個領域，麥當勞係非常有標誌性，而麥當勞仲不斷推出好多麥樂雞嘅新食法同配搭，呢個品項堪稱係經典，其他同種類商品好似好難超越佢嘅地位喎。
image source:品牌討論度係麥當勞大勝？
睇到上面嘅分析，就算最近麥當勞同肯德基都直接向對方熱門產品挑機，戰果好似都係55波，各自都有競爭力。但係再藉《KEYPO大數據關鍵引擎》分析佢哋分別嘅品牌討論度，竟然出現壓倒性嘅結果，麥當勞大勝肯德基！睇返網民討論嘅主要話題，原來麥當勞咁高嘅「網路熱度」係源自佢間唔時就會推出一次「現金券」嘅優惠，最勁嗰3個高峰分別係派「＄35」、「＄25」同埋「＄60」。麥當勞善用Facebook依類社交平台，連同其他熱門嘅生活群組，不時叫網民用留言換取「現金券」，増加品牌同大眾嘅交流之餘，仲keep到曝光同市民好感度。其實個宣傳手法肯德基都有做，不過就係單一品項嘅「優惠券」多，散佈嘅途徑都冇麥當勞咁廣。如果肯德基要増加依方面嘅競爭力，應該真係要學吓麥當勞嘅操作手法喇！
分析說明：
本研究資料由《KEYPO大數據關鍵引擎》提供，分析時間範圍為2018年12月06日至2019年12月05日。
網路大數據系統觀測港澳地區上萬個網站頻道，包括新聞頻道、Facebook、Instagram及各大討論區、BLOG等，針對討論『肯德基與麥當勞的競爭』相關文本進行分析，並根據網友就該議題之討論，作為本分析依據。
本文分析之結果，非參考投票、民調、網路問卷等資料，名次僅代表網路討論熱度大小，不代表網友正負評價。
