諗返起中學上堂，總會有唔認真上堂嘅時候，依家諗返起知道係唔啱，絕對唔係好榜樣，不過都可以話係一種回憶黎嘅。
1. 塗改液／鉛筆畫枱
上堂無聊無嘢做，唯有拎住支筆或者塗改液畫下嘢。男仔就鍾意喺枱度畫動漫啊，高達啊咁，女仔就寫下歌詞啊咁。去到要考試清枱嘅時候，就用間尺刮走啲塗改液。
2. 轉筆
話說轉筆係咪每位中學生嘅技能？拎住支筆就手痕，有啲同學係勁到轉完呢個方向，可以即刻轉返反方向。上堂就係咁練習，然後就係咁跌落枱，勁嘈！
3. 用筆袋遮住玩電話
上堂玩電話就更加唔啱啦！話說好多同學仔會將個筆袋放喺枱最前方，然後電話就放喺後面遮住，然後個人就趴喺枱，手指就係咁篤mon，其實老師企喺黑板位置望住你咁樣，係人都知你做緊咩啦哈哈～
4. 枱底食嘢
發育時期，肚仔係易餓啲嘅～加上上堂有時都幾悶，搵嘢咬下好似無咁易訓著嘛～為咗方便一口咬得黎又唔俾老師發現，就會整碎啲餅乾，一塊餅一開四咁。小編有同學誇張到將張枱整一個洞，然後放盒檸檬茶喺枱底，飲筒就可以喺個洞度伸出黎喇～
5. 塗改液畫水樽
以前返學未必個個都會帶水樽，有時落小食部買支水飲，上堂嗰陣就放喺枱面。無聊無嘢做就會拎支塗改液出黎畫滿個水樽，歌詞啊名啊心心啊，乜都有～依家諗返真係覺得件事係唔環保之中嘅唔環保啊！
6. 口形對話
即係最fd嗰啲永遠都唔會俾你哋坐埋一齊㗎嘛，you know，怕你哋上堂掛住傾計。不過唔知點解上堂特別多嘢想講，又無理由大叫過去你位對面角落嘅朋友，唯有打晒眼色叫附近啲人拍拍你個friend，然後就不停重複同一個口形，或者加啲手語咁，直到對方睇得明為止。
7. 傳紙仔
上堂唔講得嘢，咪用傳統方式囉～飛鴿傳書，求其撕張紙，寫完摺到細細舊，一係就擲一係就叫人傳過去，然後佢喺同一張紙覆完又傳返過黎咁～傳下傳下又落堂喇喂！
不過同學仔，以上提及嘅行為都唔係好榜樣，上堂係應該認真聽書㗎知無～？
Text: Holiday Editorial
（小編公告：如果讀者有任何關於美食、旅遊、玩樂、或者任何新奇有趣事物既資訊，都歡迎話比小編們知～大家可以透過Facebook inbox、或者send e-mail到holiday@presslogic.com，直接將資料傳比小編）
