不少港人每年的新春特備節目都會全家入戲院支持賀歲片,不過今年不幸爆發疫症危機,過年想避開人潮,最適合一家大細安坐家中翻煲舊片,而要數百看不厭的賀歲片當然少不了星爺的經典電影。
《家有囍事》演員班底往往是賀歲片最大賣點,要講卡士,92年《家有囍事》絕對名列賀歲片的三甲,集結周星馳、張國榮、張曼玉、吳君如、毛舜筠等群星,還有關海山、李香琴等老戲骨,個個都放低偶像包袱盡情配合爆笑劇情,即使對「巴黎鐵塔反轉再反轉」、「無定向喪心病狂間歇性全身機能失調症」等經典場景已經倒背如流,一到過年大家都會忍唔住要翻煲。
《逃學威龍3之龍過雞年》 另一部過年唔睇唔安樂的賀歲片必屬《逃學威龍3之龍過雞年》,無論今年是不是雞年都無損戲中笑位,星爺為查案而扮梅姐已過身的老公,蝦碌過程搞出個大頭佛,用腳食面、齊齊扮學生等橋段更是令人睇幾多次就笑足幾多次。
《行運一條龍》 如果認真計計條數,星爺在《行運一條龍》中的出場時間只有大約10分鐘,有傳他當年忙自己公司,根本沒有時間拍戲,嚴格而言幾乎接近客串,但都不會影響星爺發揮招牌無厘頭風格,與吳孟達對戲解釋「年初四咁嘅樣」更深入民心,成為經典賀年金句,另外戲中的港式茶記文化及香港精神亦是一大看點。
《大內密探零零發》 結合武俠元素的《大內密探零零發》是星爺的古裝代表作之一,戲中除了用「葉孤城」、「西門吹雪」等角色扭轉武俠片的既定玩法,亦出現外星人解剖會,串盡當時熱爆全城的外星人節目,又有劉嘉玲飾演星爺老婆,借爆笑劇情大談夫妻相處之道。
《西遊記大結局之仙履奇緣》 今時今日《西遊記大結局之仙履奇緣》無疑是星爺最受好評的作品之一,但回帶至1995年,電影當時由於改編劇情偏離原著和欠缺賀年味,票房和評價比起星爺的其他作品略為遜色,幸好好戲經得起時間洗禮,電影透過紫霞仙子和至尊寶的一段情論命運、因果及輪迴,到了不同的年紀再翻睇都會別有一番體會。