藝人鄧穎芝（Vangie）趁聖誕旅行旺季前，和好友到日本自駕遊旅行幾日，更穿上白色泳衣浸溫泉晒事業線，她說：「今次去咗4日3夜，除去狂食燒肉、壽司同拉麵外，仲狂買嘢，買到一個篋唔夠裝，仲臨時買多一個大袋，去咗湯布院浸溫泉，同朋友租咗間溫泉房，要成五千蚊一晚都幾肉赤，不過環境好靚！（點解唔係剝光豬浸溫泉？）因為要影相嘛，雖然同個朋友識咗十幾年，但兩個女仔肉帛相見時都幾尷尬，其他使費都唔係咁貴，成個行程都係使咗近兩萬蚊啫。」
談及旅遊趣事，她笑說：「我諗住去睇紅葉嘅，點知去到先知，原來已經過晒時，只有樹枝，紅葉就冇乜，不過好在仲有一、兩棵可以影吓相，否則就白行一趟。」至於在旅程中可有艷遇？她又說：「冇呀，因為我哋去福岡嗰個地方，平時條街人影都未見多個，所以溝唔到日本仔。」
東網網站 : https://on.cc/
東網Facebook專頁 : https://www.facebook.com/onccnews/
