現年25歲的馮盈盈，去年底宣布與十優醫生男友鍾文浩（Martin）分手，前度疑似有長髮新歡陪看日落，馮盈盈亦被爆同大隻主播鄭衍峰（Leonard）撻著，一切重新出發。出名愛情至上，馮盈盈更不計較鄭衍峰冇樣、冇事業、冇家底，倒貼60萬新車畀男友任揸，愛得死心塌地的她，拍拖三個月已讓鄭衍峰入屋做半個男主人，日前鄭衍峰到女友家過夜便被本刊斷正。不過， 28歲的鄭衍峰原來並非省油燈，早有「女神收割機」稱號，借拍《 3日2夜》狂冧女，17年就曾向甜美嬌滴滴的哈比女神鄺潔楹大獻殷勤，不過卻遭女神嫌棄派檸檬，估唔到身高和人氣都高一等的馮盈盈，兩年後會接收鄺潔楹棄兵，今鋪真係蝕章！
撰文、圖片：東方新地
馮盈盈箍唔實多女埋身醫生男友
出名敢愛敢恨、愛情至上的馮盈盈，當年為醫生前度Martin早已全程奉獻，即使事業起飛，仍高調公開承認戀情，不怕妨礙演藝前途，去年更倒貼首期幫Martin置業，即使物業冇加入自己名亦唔計較，又做埋阿四負責買家品布置新居及煮飯打掃一腳踢，可惜廿四孝女友箍唔實多女埋身的醫生男友，最終分手收場！
《後生仔傾吓偈》主播鄭衍峰大膽直接攻陷芳心
回復單身再放盤，有樣有身材有學歷的馮盈盈當然不愁冇人追，更火速有觀音兵埋身，因拍J2台節目《後生仔傾吓偈》與主播鄭衍峰撻著，被指推薦男方上節目，又被拍到除夕一齊拍拖行超市，雖然未肯公開認愛，但馮盈盈就享受人前人後晒恩愛，不避嫌與鄭衍峰經常合體出節目，再次貫徹其愛是全奉獻精神，連60萬新買愛車亦畀男友任揸，搬離前度何文田舊愛巢後以19,000元租住深水埗新居，又讓鄭衍峰入屋變半個男主人，早前各自Po相亦見同一張網墊，疑似在家玩煮飯仔。據知情者透露：「同Martin分手嗰段
時間，盈盈成日孤伶伶一個人好唔習慣，身邊朋友都好擔心，怕佢悶成日會搞聚會開解佢，Leonard（鄭衍峰）就因為拍《後生仔傾吓偈》加拿大特輯，同一班『後生仔』主持熟絡咗，佢知道盈盈甩拖，成日借機約盈盈帶佢周圍去玩，對盈盈照顧周到，女人寂寞時好想有倚靠，Leonard喺《後生仔傾吓偈》節目入面《盈盈的單身派對》『Speed Dating 』度更大膽直接表白，好快已經攻陷女神芳心！佢兩個喺電視城出雙入對，班拍檔一早知情，加上大家係年輕人，Leonard早就融入『後生仔』堆，盈盈仲成日推薦男友畀監製，等佢有多啲出鏡機會！」
鄭衍峰曾拍《 3日2夜》狂冧鄺潔楹
本來寂寂無名的鄭衍峰，因女友馮盈盈而廣為人識，更一度被誤傳是有米富二代，但其實長居溫哥華的父母只是打工仔，鄭爸爸是航空公司工程部維修人員，而鄭媽媽則是電器店售貨員，不過，畢業於著名學府英屬哥倫比亞大學（UBC）的 Leonard，即使不是高富帥一樣好有自信，讀書時已經鍾意操肌冧女，更因為43吋發達胸肌及六嚿腹肌而被《 3日2夜》監製睇中，曾拍攝多輯《 3日2夜》，在女神鄺潔楹、陳詩欣及蘇可欣身邊團團轉，借拍節目狂冧女，更因而有「女神收割機」稱號。17年便因為拍節目狂追哈比女神鄺潔楹，不過，家境富裕的 Judy（鄺潔楹），身邊早有唔少富貴兵，對外形一般的鄭衍峰根本睇唔上眼。
女神馮盈盈唔怕蝕底 甘做男友司機
追鄺潔楹事敗又如何，勇字行頭的鄭衍峰，卻越級媾掂上位女神馮盈盈，絕對賺突。日前在電視城錄影完節目的馮盈盈，即急不及待揸車趕去接男友鄭衍峰一齊返家度春宵，當晚她將車駛至寓所隔籬的南昌薈停車場，先在停車場門口接男友，不過當車駛上三樓停車場時，二人發現記者，鄭衍峰即煞有介事緊張落車，一個人逃去商場位置搭𨋢走，而本來要將車泊在南昌薈停車位的馮盈盈，亦直接將車駛返匯璽寓所，明顯鄭衍峰唔想被影到同馮盈盈一齊行返家，刻意兜路再上女友家。相隔兩日，馮盈盈又做司機，駕車載同男友由寓所出發返電視城開工，看來前一晚又在女友家過夜然後孖住返工，但到達電視城兩人卻刻意扮分道揚鑣，盈盈先在電視城外放低鄭衍峰，再獨自駕車入電視城停車場。外表精明的馮盈盈，一墮情網便變得盲目，但願女神唔好倒貼成癮，不能自拔啦！
