結咗婚8年嘅藝人李璨琛（Sam）早兩年升呢做老竇，佢囡囡李元元憑住cute爆圓面加肥嘟嘟肚腩仔，火速成為網民最鍾意嘅星二代之一，佢個社交網已經有超過十萬人追隨，就知元元嘅魅力有幾勁！
趁住鼠年啱啱嚟到，Sam同老婆及元元出街走返轉，元元反傳統唔着紅噹噹嘅衫，選擇着《龍珠》入面「餃子」一角嘅裝束，雖然少咗喜慶感覺，不過一樣可愛到爆！小朋友玩到攰梗係要上番BB車休息吓，Sam就負責推車仔，元元坐喺嘅車度不知幾梳乎仲腳揈揈，睇真啲，佢右腳竟然係赤腳！明明之前都見到佢兩隻腳有着鞋，相信都係玩得太開心甩咗隻鞋都唔知，媽咪仲搞笑代元元喺社交網度問「#老母我隻鞋呢」。
唔少網民都話佢哋一家真係夠晒搞笑畀咁多歡樂大家，不過就有人發現Sam一家三口出街完全冇戴口罩，似乎防疫意識低咗啲，留言提醒Sam為家人健康着想，出街都係要戴番口罩隱陣。
東網網站 : https://on.cc/
東網Facebook專頁 : https://www.facebook.com/onccnews/
