守護廣東話？今日就去捉字虱！
呢幾年本土文化思潮崛起，已經成為唔少香港後生仔嘅共識喇。我哋成日話要撐香港愛香港，不過愛唔係得個講字㗎，要做先夠愛，做得愈多愈愛㗎嘛。咁到底我哋日常生活仲有咩方法可以維護香港嘅核心價值？其實唔難！最梗要唔好怕俾人笑，等我哋一齊化身做認字特警，大家一齊用粵語正字，以後喺網路世界再無語癌！嗱，DailyView網路溫度計已經用咗網路大數據排咗「港人十大用錯嘅粵語正字」畀你參考吓！檢舉正字，你我有責！
DV小教室：香港網路大數據觀測咗近萬個網站頻道(而且不斷增加ing)，包括港澳地區的新聞頻道、FB、IG同埋各大討論區、Blog……透過強大嘅網文爬梳觀測，攞到巨大嘅資料樣本數，拎到上億嘅文章及留言訊息，以人工智慧的語意程式做分析。
image source:截圖自youtube鏗鏘集：廣東話
10 「果」個，邊到有水果？
果有好多意思，但絕不可用係「嗰」杯，「嗰」張紙，「嗰」個人。「嗰」先係正字，倉頡碼：口人田口。教埋你點打隻字，千其唔好再打「果」，唔好咁鬼懶啦。係咪無哂藉口？唔好比我哋下次再捉到你，到時候塞你食十個水果㗎喇！
image source:dailyview自製
9 佢「地」喺邊到？都係錯字！
呢個字好似九成九嘅人都會犯錯，好值得我哋認字特警正視問題！無錯，要維護本土文化，一啲都唔簡單囉。你「地」係錯㗎，我「哋」先係啱。諸如類推，佢「哋」、你「哋」、人「哋」先係正字，以後打字要記住鳥。
image source:dailyview自製
8 得喇，知你好鍾意「黎」明喇
四大天王之一嘅黎明，近年成為金句王之後，已經打入咗無數網民嘅內心。就算係噉，我哋都唔可以用「黎」代替「嚟」，「嚟」係「來」嘅意思，同時亦係重要嘅語助語。例如，肥佬黎？佢好人嚟架！黎明？好嘢嚟！~~~
image source:dailyview自製
7 「米」奇老鼠並唔係萬用㗎
Stop！我唔係要講曾志偉，我要講嘅係「米」呢個字，已經俾人濫用到離哂大譜喇！只要一見有人用我係「米」，你「米」噉，真係睇到成個人好鬼燥。正字係「咪」先啱，打之前讀吓，「米」、「咪」唔同音㗎大佬！
image source:dailyview自製
6 「呢家」都有口音，你咩鄉下？
勿演、懶肉、實小勒、凍鏈茶……去譚仔食嘢就話會聽到譚仔姐姐獨特嘅說話技巧啫，點估到連網路世界都有呢種情況噃！最近唔少人都會用「呢家」，咁其實佢哋係講緊正字「而家」。喂呀哥，兩粒字仔連讀都唔鬼同喇，打字唔好有口音好嗎？
image source:dailyview自製
5 咁右呢？你「左」夠未啊？
網路紅人肥絲大隻成日捉大家錯字，講得最多嘅，一定係「左」喇！好多人貪方便都會順手打做：「喂你食左飯未？」「我食左喇。」咁其實「左」係表達方向嘅，所以平時唔係要表達方位嘅，請你用返「咗」，先唔會俾肥絲捉。
image source:dailyview自製
4 「系」自古有之，但唔好再用
如果我哋查字典，會發現「系」呢個字，原來有「是」嘅意思噃。但文字係約定俗成，隨時代演變嘅，今時今日，用「係」先係正確嘅主流。唔信？你試吓上網用呢個字，隨時俾人笑你5PMK無文化㗎！跟我講一次，我係唔會用呢個「系」嘅！
image source:dailyview自製
3 用呢個「牙」小心比人打呀！
召喚「牙你老母.GIF」！呢個可能係巴絲打最哽眼嘅錯字，2014年先有香港樂隊Faith用錯，俾人恥笑到2046。「牙」喺我地把口入面，用嚟食嘢，唔係加強語氣嘅語助詞。「呀」、「啊」先係正確用法，記得千其唔好喺論壇打錯，費事好多人排隊搵伯母喇！
image source:dailyview自製
2 你估你卜「卦」咩？錯錯錯！
如果我地要占卜，咪會有「卦」象囉。又或者同人地講八「卦」，噉呢個字就無用錯啦。但當我哋講：G.E.M.同經紀人公司解約，唔係「啩」？呢粒先係正字，唔係「卦」、「掛」同「呱」。
image source:dailyview自製
1 係「喺」不分？孖生兄弟好難認！
歡迎我哋嘅錯字冠軍，係「喺」呀！講真，呢個字真係成日會搞到人頭暈㗎，皆因佢有個兄弟，生得好鬼似，就係「係」喇。「喺」呢個字要用係時間、地點，好似我地喺香港，我哋喺三點見噉。
image source:dailyview自製粵語用字小知識：潮流真係好緊要
文字演變嚟講，約定俗成真係最重要嘅規則，簡單講，即係「誰大誰惡誰正確」，當一個錯別字愈嚟愈多人用嗰時，用到全世界都覺得，哇，呢個先係正字喎！咁最後約定俗成，就會演變成為正字喇！不過，呢種演變都往往會跟返字形字音，並唔係創作力量同幻想會嚇你一跳噉誇張嘅。所以，我哋了解平時粵語嘅正字，雖然未必要做認字特警，但知道返每個字嘅來龍去脈，絕對有助維護本土文化。愛香港，由撐粵語做起！
分析說明：
本研究資料分析時間範圍為2018年09月08日至2019年03月09日，約半年。
網路大數據系統觀測港澳地區上萬個網站頻道，包括新聞頻道、Facebook、Instagram、Twitter及各大討論區、部落格等，針對討論『港人十大用錯嘅粵語正字 』相關文本進行分析，並根據網友就該議題之討論，作為本分析依據。
本文分析之結果，非參考投票、民調、網路問卷等資料，名次僅代表網路討論聲量大小，不代表網友正負評價。
查看原始文章
留言 (0)