近期全情投入賣保險的林作，昨日在社交網借電影《黑豹(Black Panther)》男主角Chadwick Boseman的死訊叫人買保險：「45歲就大腸癌過身。疾病無從預測。一定要早啲check。check之前，記得搵#林作保險。」被網民轟抽水賣保險，更寫錯43歲離世的Chadwick Boseman年齡為45歲，極不尊重人。當王貽興出文鬧爆，林作連出多Post還擊之餘，後者更為表自己「夠薑」，連早前離世的Kobe Bryant都照抽水賣保險。
王貽興出文鬧爆之後，林作今日就在facebook出文：「出完post 1 分鐘已經有人inbox我。 王貽興，不要五十步笑百步啦。You are really making me famous, stupid.」亦上載聲稱是inbox的對話：「寫文能力真係好一般。」「陶傑好多年前話香港係文化沙漠，其實如果王貽興之流仲有人吹捧，證明文化水平到而家都無咩進步。」
提到自己媽媽，林作又出文：「我阿媽打嚟，認真問句：佢乜水？lol enough said. 拍咩劇寫咩文，效果都係一般，絕對唔係個成功人。靠抽水同我一般見識就真係前輩。幾年前就已經領教過此人之卑鄙。我以為佢係感情專家，同佢私底下於Facebook Messenger傾咗一陣，甚至好似有講過下電話。然後呢？佢轉頭將一部份明顯係私人對話寫咗出嚟擺上網。當時我就知道，此人絕對係小人。最不要得的是，佢最新攻擊我的post裏面一個hashtag講到聽聞我媽媽借財仔俾錢我溝女，呢種毫無事實根據嘅言論，其實對我而言唔叫誹謗中傷我真係唔知係咩。我保留一切追究權利，雖然學我老母話齋：識佢老鼠（媽媽私底下真實對白）。#聽聞佢私底下啲嘢好差 #收過不少message甚至朋友經歷唱佢 #有料嘅人鬼得閒寫咁多嘢 #冇新聞巴不得搵嘢講」
