無綫藝人陳山聰與圈外女友Apple結婚，圈中的一班戰友Crazy Runner跑友袁偉豪、姚子羚等都已收到通知，姚子羚接受東網訪問時，坦言與Apple好熟，平時稱呼對方做阿蘋：「山聰娶到阿蘋直頭三生有幸啦！阿蘋好識照顧佢，成日煲湯畀佢，仲益埋我有得飲，呢啲女人邊度搵呀，而且阿蘋對山聰好好，但佢總有辦法治到佢，山聰一飲多咗，佢一句說話就可搞掂佢，兩個好搞笑。」
袁偉豪表示看到兄弟組織家庭感開心，他謂：「我同山聰識咗20年，以前大家事業都冇依家咁好，5年前佢教我跑步，期間大家互相鼓勵，佢近年捱得辛苦，我會叫佢頂住，就好似佢跑步時叫我頂住一樣，所以佢結婚，邁向新一步，我好戥佢開心。」而另一兄弟黃祥興大讚Apple是一名很乖的女仔，與山聰一凹一凸，已有一仔一女的祥興，更叫山聰快點做老竇謂：「我咁早結婚生仔都係想把握時間，佢都要快啲嘞！」
東網網站 : https://on.cc/
東網Facebook專頁 : https://www.facebook.com/onccnews/
