情人節啱啱過去，唔知一眾單身狗被閃盲未呢？定係你就係放閃嗰個？講到放閃，一班明星都唔輸蝕，放閃方法更加各式其式，要高調有高調，要低調都有低調，更加有人選擇喺情人節公佈喜訊！
李彩華宣佈婚訊
打響頭炮嘅有李彩華，Rain尋日喺社交平台宣布婚訊，更加表示「Rain + Eric = Mr & Mrs Huang 」，呢個閃光燈超級龐大！
婚紗照都高貴大方，要一直幸福快樂，Keep Sweet 啊！
岑麗香尋日上載同老公一齊影嘅大肚照，照片中香香散發著嫵媚感，準媽媽一副幸福嘅樣子實在係羨煞旁人！
單人照都一樣性感迷人，呢位準媽媽太美了吧！
用美美孕照放閃嘅又點止香香一個，尋日Grace都公開上載咗之前拍攝孕照嘅花絮片段。影片中見Grace以3個造型示人，包括性感吊帶長裙、一字膊長裙，以及黑色單膊長裙，3個造型同樣仙氣十足，加上甜美嘅笑容，完全感受到嗰種滿滿嘅幸福！
前面兩位準媽媽就用孕照放閃，已經做咗媽媽嘅就post前世情人同今世情人放閃！胡杏兒上載咗老公同仔仔合照，並寫到「To my Big and Little Boyfriends, Happy Valentine’s Day！」老公同仔仔搞鬼嘅樣子實在太可愛啦！
陳智燊上載家庭照並表示仔仔同老婆宋熙年係佢嘅快樂來源，要多謝佢哋兩個令自己成為呢個世界上最開心嘅人。
老婆宋熙年同樣上載家庭照，兩個人親吻仔仔嘅面珠墩，更講笑寫到「＠chanjason_ is third wheeling…」表示老公先係電燈膽呀！
之前留言護花事件，網民已經話阿Ben係霸氣男友，會挺身為女友張寶兒發聲。霸氣男友又點會放過情人節放閃嘅機會！袁偉豪尋日上載咗同張寶兒嘅照片，照片攝於早前賽車慈善賽，照片中見到阿Ben對寶兒呵護備至，二人有講有笑，甜蜜指數爆燈，小編表示睇到呢度已經盲咗啦！
你可能以為放閃嘅方法都係不外乎個幾種，咁你就錯啦……張繼聰尋晚上載於尖沙咀碼頭自彈自唱「每天愛你多一些」嘅短片，表示呢個係比老婆謝安琪嘅小驚喜。佢話老婆表示唔要物質嘢，所以決定帶阿Kay去尖沙咀碼頭，然後問正在Busking嘅人借結他同其他儀器去演奏一曲冧老婆！
更寫到希望呢個「難忘嘅冧豬嘅幾十年後都記得」。片中見到阿Kay嘅冧樣可見呢個驚喜同冧豬方法十分成功，所以話放閃方法沒有最誇張，只有更誇張！
高調有高調放閃，低調都有低調放閃，新婚夫婦黃翠如蕭正楠尋晚就上載咗兩張人樣都無嘅生活照。蕭正楠嘅照片影住一鍋胡椒豬肚雞煲並寫到「情人節大餐」。
而翠如嘅照片就影住二人手指尾勾住小小玫瑰花，雖然兩個人嘅照片樣都無，但已經足以感受到二人幸福嘅新婚生活，平平淡淡過情人節一樣浪漫。
**Follow us on:
- Facebook: CosmoHK
- Instagram: @cosmopolitan_hk
- YouTube: CosmopolitanHK**
