其實除咗超蓮去咗泰國拍廣告，連男神金城武都去咗泰國拍廣告呀！佢今次嘅廣告去咗泰國中部古色古香嘅北碧府取景。北碧府距離曼谷大約三個鐘車程，兩三個朋友去搭小巴又得，包車都得！下次去泰國可以跟男神睇下當地靚景！
天堂瀑布 - 伊拉旺七層瀑布
北碧府嘅伊拉旺國家公園裡面有個七層瀑布，靚到好似人間仙境咁，所以又有個講法係天堂瀑布。有人話最高一層就好似印度神話裡面嘅因陀羅（梵語：इन्द्र，Indra）嘅座騎三頭象伊拉旺而命名。瀑布嘅水喺陽光折射下係藍綠色，所以對當地人／遊客嚟講，呢到都係一個又神聖又靚嘅「仙境」。
死亡鐵路 - 桂河大橋
桂河大橋係由二戰戰俘所建造、由泰國通往緬甸嘅鐵路。由於建設時死傷人數多，所以被稱為死亡鐵路。呢到嘅歷史同意義相信對世人嚟講都非常重大，值得一去。
古色古香 - 茉莉之城
茉莉之城係以泰國舊有生活而聞名嘅一個地方，顧名思義係一個充滿茉莉嘅地方。但除咗有茉莉園之外，呢到嘅風土人情都吸引好多遊客慕名而來！茉莉之城建築充滿泰國傳統特色，每日都會有各式表演。當地人仲會用傳統泰國貨幣（Satang）而唔係泰銖，十分有趣！
圖片來源：Thailand National Parks、Diego Cambiaso(flickr)、Mallika City, 1905 A.D. 延伸閱讀：腳軟無法直視！玻璃地板懸浮飽覽曼谷 / 泰好住！布吉五星隱世酒店！
