辦過婚禮的過來人都會同意，一場婚禮就如一場show，千辛萬苦才準備好一切，只為賓客開心出席，自己留個美好回憶。身為朋友，收到喜帖準備去飲，都有注意事項需要留心，勿破壞人家的婚禮而不自知。
1. 早到比準時出席更重要
「五時恭候，八時開席」但大多數新人未能準時開席，只因大家去飲都將時間預得非常緊湊，夠鐘才入場，令主人家不得不延遲開席，overrun到11點才散場。建議大家至少提早半小時至一小時到婚宴場地，預留充足時間跟新人合照，尤其觀禮，更需要早到等候新人進場！
2. 不應臨時攜眷/ 闔家出席
明明喜帖上只有你的名字，但你就帶埋男朋友甚至一家大細出席，卻沒事先通知，搞到新人唔夠位。要知道主人家擺酒圍數有限，一早算好賓客人數，臨時放飛機或加人頭，都令對方失預算！
3. 打牌要識節制
婚宴早到，開枱打牌是常識吧！不過牌癮起的人一定要有自制能力，小心言行。當場地經理提醒大家打埋呢鋪要入席時，就要聽從安排，記住你係嚟飲，唔係嚟賭錢。
4. 婚宴位置勿亂坐
主人家一早編好婚宴座位，大家應該根據指定圍數入座。試過有賓客亂坐枱號，其他賓客無位坐，搞到要姊妹團拎座位表幫忙對號入座，阻礙開席。
5. 賓客穿搭宜忌
賓客去飲最緊要打扮大方得體，熱褲、小背心迷你裙統統no way。之前女子組合Super Girls成員趙慧珊(Aka)出席林奕匡的婚禮，穿上白色連身裙而被指違反禁忌。想知點著先最恰當，參考婚禮穿搭之道取經吧。
6. 打包好失禮？錯！
臨近婚宴尾聲，場地傳菜職員會問大家打唔打包，好多時賓客（尤其年輕一輩）都你推我讓，怕被指貪心或失禮而唔拎。其實根本毋須擔心打包會失禮，一旦無人取走，食物會變廚餘，更加浪費。
7. 人情毋須交到新人手上
無論你去觀禮還是去飲，人情都不用送到新人手上，只須在人情禮儀封上寫好名字及對新人的祝賀說話，交到迎賓接待處的兄弟姊妹手上即可。
8. 做人情要夠得體！
大家都知去飲人情有公價，但只觀禮、唔去飲一樣有指標。唔想結完婚無朋友做，記緊做足人情！
按此了解觀禮及唔去飲人情公價
9. 諗定祝賀說話
「恭喜你呀！」「祝百年好合、早生貴子、三年抱兩！」出席朋友的婚禮，同行友人講晒呢幾句恭賀說話，仲有咩好講？不妨讚下新娘今日打扮好靚，揀婚紗有眼光；又讚下新郎哥有眼光娶到靚老婆，輕鬆又甜蜜的對話，比起客套傳統老句更有心。
10. IG 分享靚相有秘訣
出席婚禮影過嘅相唔好出完IG Story就算，好多新人都專登作咗wedding hashtag，希望大家影過嘅婚禮合照同花絮都hashtag返，方便新人收相。下次出席婚禮時，留意吓現場指示，幫新人留個回憶啦。
**Follow us on:
- Facebook: CosmoHK
- Instagram: @cosmopolitan_hk
- YouTube: CosmopolitanHK**
