藝人羅霖以顧問身份出席「仁美清敍」聖誕派對，低胸上陣的她，透露近日工作忙碌，昨日剛從上海返港，晚上即出席細仔學校的音樂會。提到客串拍攝無綫劇《逆天奇案》，有好多個第一次，她說：「第一次拍自殺割脈戲、第一次拍浸浴，嗰日得12度，點知拍拍吓導演嗌Cut，原來我流緊汗，死咗唔可以出汗。」
她更自爆在劇中被張國強真打：「畀人打嘅戲，第一個係曹達華，第二個就係『KK』張國強，有場戲佢要打我，未拍前佢話放心啦，會就住我，對佢印像好好，點知佢狂打我6、7巴，嗰刻我呆咗，眼淚狂標，工作人員都話打到啪啪聲，我冇嬲佢，佢有解釋係為咗入戲，有同我講sorry。」她笑言：「好彩我眼耳口鼻係真，有少少痛。」回家後，兒子也忙安慰媽咪說：「做戲要真打？好慘。」她又講笑「冇收錢」，因客串收入不足以找化妝費。
東網網站 : https://on.cc/
東網Facebook專頁 : https://www.facebook.com/onccnews/
