藝人余香凝為首次舉行的演唱會舉行記者會,即席演唱新歌造勢。入行10年的她雖自稱「老屎忽」,但坦言:「聽到有人邀請,起初都擔心唔夠歌,又同主辦方講我冇乜粉絲喎。其實唔好講係演唱會啦,好大嚿嘢壓落嚟,我會盡力同粉絲分享就真。」
今次演出編排全由她一手包辦:「會同粉絲分享入行以來嘅一切,包括遇到困難嘅時候。(試過有挫敗?)好似啲網絡攻擊與批評,有啲係善意嘅,例如會話我唱歌有啲咩地方要改進。遇到類似嘅問題,我通常會聽歌,同埋多謝屋企人嘅支持,所以呢次妹妹都會上台同我合唱,我驚到時喊到收唔到聲。」
她又自爆原本想在快歌環節一展舞技,不過已遭公司同事「極力阻止」:「我天生手腳唔協調,佢哋驚我跳舞嚇走晒啲人,都係留番下次先。」由於目前體重約120餘磅,更被同事叫肥妹,余香凝表示:「新年後會努力減肥,目標起碼減10磅。(體重高峰期?)磅數差唔多,但我覺得自己係大隻,如果減肥成功嘅話,快歌嗰part唔排除會性感啲演出。」
東網網站 : https://on.cc/
東網Facebook專頁 : https://www.facebook.com/onccnews/