香港人最愛做嘅事就係去旅行，離開呢個繁忙都市去享受一下人生。每當問到邊個會係理想中嘅旅伴，好朋友必定榜上有名。但理想同事實一向都有距離，一齊嚟睇下同好朋友去旅行會有啲咩煩惱事情啦！話唔定你都曾經面對過呢啲問題。
#整潔問題
唔少女仔留有長髮，沖涼嘅時候就會有唔少頭髮掉落，堵塞喺去水口。你可能會諗沖完執起啲頭髮係理所當然啦，但你嘅朋友有無養成咁嘅習慣呢？話唔定最後你就要做埋佢果份啦！
#無所謂但挑剔停不了
計劃行程嘅時候最怕聽到一句無所謂！呢類人好多時都唔會提出自己感興趣嘅景點或者餐廳，喺計劃嘅時候亳無意見。但當你開始按行程遊玩嘅時候，佢地就會開始發表自己嘅意見，再不停咁問你點解無將佢地感興趣嘅地方加入行程。
#旅行節奏不一
去旅行嘅時候大家嘅節奏係可以好唔同咖！有啲人可以喺街上面玩成日到深夜都唔覺攰，亦有人比較鐘意較為輕鬆嘅節奏，行成日並唔係佢地嘅習慣。咁就不如準備兩種路線，等大家可以到食飯時間先再集合啦！
#機不離手
時下流行喺社交網站上分享生活，你又有無朋友喺旅行嘅時候無間斷咁影相P圖打卡呢？比起享受當下，佢似乎更加沉醉喺線上世界當中，而你就只能夠獨自享受當地嘅風情，又或者被逼齊齊睇手機。各位記住要學會喺旅行嘅時候放下手機啦！
雖然大家嘅旅行習慣各有不同，但最重要嘅都係學會包容溝通，畢竟人越大，可以抽時間同閨蜜一齊去旅行嘅時間就會越少。所以每一次去旅行嘅機會都要好好珍惜呀！
