董敏莉與梁漢文在ViuTV劇集《假設性無罪》中飾演夫妻，表面是模範夫婦，實質關係早已平淡如水，各自發展婚外情。梁漢文與太太好友（羅沛琪 飾）偷情，其後董敏莉發現丈夫的外遇正是自己好友，夫妻關係正式破裂。日前，二人為劇集先後拍攝兩場重要戲份，先拍攝吵架戲份，隨後緊接拍攝熱吻戲份。
久未拍劇的董敏莉大讚梁漢文專業，與她分享口腔清潔用具，為接吻戲做足準備：「佢臨埋位前比咗粒丸我，原來沖水會變做漱口水，大家都好Fresh！我比較少拍呢類親熱場面，所以今日都係極限架喇！事前都有同老公講，佢反問我有幾激，之後笑笑口行咗去！」對於董敏莉大讚自己拍攝接吻戲專業，梁漢文謙稱自己不是專家：「我經驗都唔係豐富架咋！做好準備係尊重對手囉，好在平時去外地做騷要坐長途車，有晒呢類清潔用品，今日終於大派用場啦！」
梁漢文在與董敏莉的鬧交戲中處處忍讓，笑指與現實相似：「男女相處之道都係差不多啦！兩公婆相處要互相遷就先可以和諧架嘛！」董敏莉指平日跟老公甚少吵架：「鬧交需要好多能量，所以現實中會選擇冷戰，因為可以慳番啖氣！同埋個女出世後，差唔多冇鬧過交喇！」