前任呢兩隻字，一直係女生嘅終身敵人，即使男人嘅前任無當現任係敵人，現任都一定覺得男友嘅前任唔慌係好人。
講到尾，都係男人點樣定位。好多人都認為分手之後，就應該將前任嘅contact delete、unfollow Facebook同Instagram，既然分得手，又何必再畀雙方有返轉頭嘅空間呢？
但女人仍然會覺得未夠，心諗delete fb、ig就梗㗎啦，若然巴打們仲有啲乜費物費係前度幫你交開嘅，甚至同前度開過聯名公司、銀行戶口之類，就更加要記得搞埋啲手尾，若然仲有手尾跟，都難免會畀條女誤會你仲想藕斷絲連，想借機再同前任有任何交流見面⋯⋯
有女人同我講，點解男人要同前任斬到恩斷義絕，老死不相往來，原因有以下幾個：第一：係尊重現任，令佢安心嘅做法；二：同時尊重前任嘅現任，亦唔畀對方有誤會你係第三者嘅機會；三：將前任嘅所有憑証消滅，費事現任有任何誤會你或者趁機發圍嘅機會⋯⋯
好多女仔平日睇落懵懵吓，但一牽涉到男友嘅前任，一個二個即刻化身「名偵探柯南」，若然你仲有殘餘嘅證據喺fb、ig，以佢哋嘅偵探頭腦，終有一日會搵到前任，再深入研究對方嘅fb、ig，繼而再旁敲側擊chok吓你⋯⋯
例如問你覺得前度點呀？前度有新男朋友未呀？點解會同前度分手呀？從而去推斷你同前度仲有無聯絡或者重燃愛火嘅可能，甚至乎質疑你係咪將佢當成係一個退而求其次嘅選擇⋯⋯
就算無答錯，只要答案唔啱聽，就算寧王無即場發唐伯虎爛渣，最後無嗌分手，都一定會畀佢拎呢件事出嚟講一世，次次嘈交都拎返前度出嚟講，你都咪話唔死⋯⋯
當然，你藝高人膽大，絕對可以堅持要對方出示委任証同埋申明理據，重申自己「我無嘢講，我唔解鎖」，又或者乜都答唔知、唔記得。但講到尾，最佳嘅做法，係趁條女開始check你之前，先下手為強，消滅晒所有同前度有關嘅一切⋯⋯
曾經有套電影叫《國定殺戮日》，在特定日子殺人不算犯法，我想，在這無法無天的城巿，會不會有天，將會出現《前任殺戮日》？
**Follow us on:
- Facebook: CosmoHK
- Instagram: @cosmopolitan_hk
- YouTube: CosmopolitanHK**
