50歲天后王菲與前夫李亞鵬所生嘅女兒李嫣尋日14歲生日，正日當然同媽咪過，佢仲將慶祝照片放上社交網與眾同樂。相中見李嫣染上一頭金髮，巧妙地以黑色西裝褸襯衫髮夾及頸鏈等閃石元素配飾，完美遺傳媽咪嘅時尚觸覺，而王菲就着上紫色卡通人物T恤，除咗攬住李嫣似足兩姊妹一樣，同友人托下巴合照盡顯青春。
派對上李嫣獻唱台灣歌手張懸歌曲《喜歡》，原來王菲2011年於成都演唱會中翻唱過，李嫣藉住今年生日唱畀媽咪聽。作為女兒嘅佢更係王菲小粉絲，連手機穀都用上媽咪「跟你有甚麼關係」嘅表情包，最搞笑係連好友都一齊用，認真可愛！相中未見李亞鵬蹤影，不過2013年與王菲離婚後，二人一直保持聯絡，再見亦是朋友。
東網網站 : https://on.cc/
東網Facebook專頁 : https://www.facebook.com/onccnews/
