談起星二代姊妹花，王曼喜（Kayla）和王麗嘉（Irisa）必定榜上有名。兩姊妹遺傳自父母王敏德、馬詩慧的亮麗形象和好身材，加上IG不約而同大曬性感照，大膽挑戰裸露尺度，吸引眼球。但大家眼中只看到Kayla 和 Irisa 的外在，卻未必了解她們的姊妹情和內心世界。
王曼喜少時反叛愛自由，成細妹的擋箭牌！
兩姊妹美國留學歸來，鬼妹仔性格，自由自在無王管，誰料到媽媽Janet自小對兩姊妹管教甚嚴，既不能在外過夜，又不能紋身、穿耳等等。幸有家姐王曼喜的反叛，打破先例，妹妹王麗嘉才重獲「自由」：「無咗佢，我有好多嘢都做唔到！唔係佢自己做research 同媽媽提出去美國讀書，我都未必有得去；因為Kayla紋身、穿耳，我又跟住做。因為佢做咗，我先無俾媽咪鬧。」Kayla 加把咀：「佢釘多十個耳窿㖭！」可見有家姐做擋箭牌，多幸福！
愛情大過天 V.S. 姊妹情深
有姐的孩子像個寶，但Irisa 也不滿Kayla 愛情大過天！兩人即使同一屋簷下，很多時只靠IG 溝通，單身中的Irisa 借機表達不滿：「佢掛住拍拖呀！（你唔做電燈膽？）佢都無邀請我！」Kayla 馬上辯駁：「身邊好多朋友都重色輕友，我覺得好正常…」話口未完，妹妹再發聲：「我最憎啲人係咁！一拍拖就唔理我，但一分手又返嚟搵我。」看得出妹妹醋意甚濃，也甚需要姐姐的重視呢！
見到妹妹呷醋，家姐當然識做，立即安慰：「 佢始終係我最close 嘅人，雖然依家未必成日溝通，見面唔多，但佢嘅地位好重要。無咗佢，好似無咗一忽肉咁！」
Kayla 喜歡同性，令姊妹陷入冷戰！
姊妹間怎可能沒有嘈交冷戰？最大一次磨擦要回到中學時。那時兩姊妹讀同一間女校，妹妹Irisa 或多或少都見過家姐跟同性有親密接觸，有時甚至會帶回家。當年15、16歲的Kayla 已經知道自己喜歡女生，但比她少兩歲的Irisa對愛情依然懵懵懂懂，對家姐的性取向大惑不解：「以前細個唔係好明同性戀呢個概念，唔明點解女仔同女仔可以一齊。當時我好唔開心，好嬲，即使同家姐同一間睡房，都唔同佢面對面傾，只係打咗好大段短訊俾佢，問『點解要中意女仔？可唔可以唔好咁做？』」
舊事重提，Irisa 還記得當時家姐沒回覆，而Kayla 就話當時很不開心：「當時有段日子佢好抗拒我，而我始終都好介意屋企人點睇，尤其係妹妹，因為我一直覺得我同她最close，但同我最親密嘅人原來一直都唔太明白我。」雖然Irisa不記得之後如何接受家姐出櫃，但她卻是第一個認識Kayla 伴侶的親人，可見家姐的心裡把她放在第一位。
Kayla大膽愛！同樣渴望成家立室
王曼喜數年前承認出櫃，得到家人支持，每逢有新對象都會介紹給他們。即使是同性伴侶，父母都好著緊女兒的愛情：「佢哋會問好多背景，例如點識㗎、做咩㗎、同咩人一齊玩…等等。」伴侶更加會出席家庭聚會，成為王氏一分子！Kayla 依然期待和努力爭取香港同性婚姻合法化：「結婚雖然只係一張紙，但呢張紙賦予伴侶權利，當對方有咩事，另一半都可以喺病床邊下決定。」
Irisa 自省愛情觀：由速食愛情到渴望成家立室
外人只關注王曼喜的同性戀情，卻甚少關心妹妹Irisa 的愛情世界。 Irisa 拍過6、7次拖，但原來有近半都屬速食愛情：「3、4年前試過幾個月內date 咗幾個人。我知我嗰陣好衰，只係拍咗幾個月拖，多數係我提出分手先。因為我唔鍾意男仔太痴身，我都試過好鍾意一個人時會好痴身，但當時我無，所以我知自己玩玩吓。」
從情場抽身，今年只得24歲的Irisa 已非常渴望結婚，更加想生BB：「媽媽都知我鍾意結婚，成日都同人講㗎啦，佢自己都想有孫抱！」問到擇偶條件，Irisa 立即提出：「希望老公高過我，要係一個好人，搞笑、幽默、caring…」可惜媽媽同家姐都無介紹，唯有自己努力！
不吝嗇好身材！兩姊妹互讚對方更索更大膽
擁有「王家最強模特兒基因」，兩姊妹經常作性感打扮大騷身材、尺度之大連女生也不禁想望多兩眼。兩人在IG 分享的靚相中，性感晚裝、泳衣照已是家常便飯，床照甚至裸照也非禁忌，大膽中見自信！
問兩人覺得誰更索？Irisa 率先搶答：「我眼中嘅索係有自信，我覺得Kayla 好有自信，IG 相可以唔PS （執相）都得，又唔介意show俾人睇到皮膚敏感，比我更加有自信！」
Kayla認同妹妹對索的定義，但就話兩人路線不同：「Irisa始終係model，有超長腿，大家鍾意睇佢著衫、styling。佢都好夠膽post 裸照，唔會驚人話，會分享自己嘅自然美態。我覺得自己走嘅路線親民啲，平凡啲。」
早前Kayla因手上有脂肪瘤而要做小手術，手臂上留下明顯疤痕，她也不介意分享。人無完美，最緊要識得欣賞自己，這就是兩姊妹都擁有的自信。
仔細留意，Kayla 和Irisa 手上都有同一紋身圖案，原來是她們的姓氏 —— 王。那年Irisa 19歲，隻身在美國留學，難得逃離媽媽的嚴厲管教，好想學Kayla 紋身，所以請她親自設計姓氏紋身，作為19歲的生日禮物。先斬後奏，媽媽當然無say，而這個family tattoo 也成為她們這輩的象徵，連弟弟、表親們也紋在身上，感覺關係更親密。Irisa 也自豪地說：「I’m proud to be Wong!」
再自信也會倒下！Kayla、Irisa同被嘲似人妖
▲Kalya 的伴侶曾趁她裸體時舉機拍照，Kayla 也敢於分享。
傅媒經常話爸爸王敏德不滿兩姊妹大騷身材，到底是否真有其事？兩姊妹異口同聲話：「可能開頭Daddy 會介意，但依家無咩嘢，甚至佢會讚啲相靚！出席活動前著得性感啲，佢都會講『oh you are so nice!』」
除了爸爸識欣賞，媽媽Janet也非常支持！她更常常跟兩女出席活動、歎tea 和打卡，儼如「王家三姊妹」，非常搶鏡！
然而，Kayla 和Irisa 有父母的明星光環，加上做模特兒等同半隻腳踩入娛樂圈，少不免會有網民惡意攻擊，「好醜樣，唔好再post 樣衰泳衣相」已是最溫和的批評，Irisa憶述最過火言論：「有人會專登message話我哋兩姊妹好似人妖！」
家姐Kalya 話再自信也有倒下的一天：「無可能 365日都有自信。有時都會有低潮，聽到會唔開心。所以發生呢啲事時，有家人和朋友喺身邊支持鼓勵好重要。」面對無聊批評，兩姊妹現在已經練得一身好本領——沉默就是最好的回應！
Credits:
Photos by Josh Chow; IG @kaylaiw, @irisashannon
Styling by Sandy; assisted by Yuki Chu
Accessories: Fendi, Louis Vuitton, René Caovilla, apm Monaco, Atelier Swarovski
Makeup: Wendy Lee @ Wendy’s Workshop;
assisted by: Kineta Cheung @ Wendy’s Workshop
Hair: Hugo @ ii alchemy
Location: St. Regis Hong Kong
**Follow us on:
- Facebook: CosmoHK
- Instagram: @cosmopolitan_hk
- YouTube: CosmopolitanHK**
