去中心化嘅新世代抗爭模式
香港由6月起至8月為止，因為「反送中」逃犯修例事件引起嘅社會運動，隨著警民衝突嘅情況愈嚟愈多，無數流血事件出現，激化咗香港市民嘅不滿情緒，連國際人權特赦組織都話香港警察濫用武力。更加唔好講，7月21號元朗黑夜，連《時代》雜誌都出哂調查報告，講明警察對黑社會毆打市民視而不見。而到8月11號，多處地方警民衝突，警員近距離向抗爭少女眼部開槍，令之後嘅抗爭者聲言要「警察還眼」。一連串嘅事件，抗爭者無大台，但就借助各種嘅網路平台發起一次又一次嘅運動，成為咗國際上去中心化抗爭嘅示範。今日就等DailyView用網路大數據話你知，到底香港抗爭者點樣運用網路平台喇！
DV小教室：網路溫度計透過《KEYPO大數據關鍵引擎》大調查觀測咗近萬個網站頻道（而且不斷增加ing），包括港澳地區的新聞頻道、FB、IG同埋各大討論區、Blog……透過強大嘅網文爬梳觀測，攞到巨大嘅資料樣本數，拎到上億嘅文章及留言訊息，以人工智慧的語意程式做分析。
連登時事台，香港人主場
香港今次「反送中」引起嘅社會運動，由一開始講要反對逃犯修訂條例，到而家主張嘅「五大訴求」，香港抗爭者以Be water為口號，一次又一次咁進化，改變抗爭策略。雖則香港政府都仲係話，抗爭者背後係有大台嘅，有人領導嘅，但更多嘅專業時事評論員、學者都講，今次抗爭係無大台，正因為咁，先會打唔散，因為每一個人都係自己嘅大台。根據上圖可見，由8月10號到8月17號，講818民陣維園集會嘅咁多網路平台，最熱門嘅要數連登。大家都知連登係網上討論區，開放、自由同即時嘅特色，令佢成為咗今次香港人嘅主場，引領咗成個運動嘅風向。下文話你知，連登喺8月10號到8月17號回文最高嘅文章講咩喇！
818係和理非遊行
——和平、理性、非暴力
連登有個Post相當受歡迎，入面提出嘅論調，都可以話深入民心。〈818勇武真係要退一退…818再有勇武場運動真係玩完, 818 50萬人和平遊行完係交個波比政〉貼文話，跪求大家三思而後行，話818民陣嘅集會，一定會有鬼刻意搞事，挑撥離間，甚至做出激進行為。所以呢，呢次嘅集會定要和平、理性同非暴力。有唔少巴絲打回文都同意呢種講法，係時候俾和理非出吓力，唔需要次次都咁激，之後政府唔理就再升級囉。呢種講法，相信都係好多巴絲打目前嘅諗法。
image source:FB 民間人權陣線 Civil Human Rights Front
818天安門撐警集會
——中國的人權狀況是最好的
中國同胞一直都好關注香港抗爭運動嘅發展，係唔同嘅社交網路，都周不時見到有中國網民翻牆簡體字嘅留言。有見及此，連登巴絲打都好有創意，喺〈8月18日北京天安門舉辦支持香港警察集會〉Post咗張中國網民發起支持香港警察，要上去北京天安門集會嘅活動，仲寫埋係人民日報、新華社同共青團中央一齊合辦，認真把炮。中國的人權狀況是最好的，難怪咁多連登巴絲打都異口同聲，呼籲香港愛國愛黨支持警察嘅人出席。
image source:LIHKG 〈8月18日北京天安門舉辦支持香港警察集會〉
勇武手足818都做次和理非
——輪住上場，無得輸
連登平時一向鍾意咩人都笑一餐，又點估到喺「反送中」抗爭運動，真正實踐嘅We-connect嘅大和解精神。喺〈勇武兄弟有冇興趣入黎傾傾有關818事宜〉，巴絲打好有禮貌，心平氣和咁同前線嘅兄弟講：818休息吓，你哋辛苦哂喇！「要比勇武有彈藥，有理由去繼續抗爭」。個個都話，勇武就點都支持，核爆都唔割，但係818和理非一次，點都有好處。休息，係為咗走咁遠更路，相信勇武巴絲都收到！
image source:FB 民間人權陣線 Civil Human Rights Front
818要過百萬人嘅文宣工作
——鍵戰都可以好有影響力
連登巴絲打唔止只係識圍爐取暖，喺今次抗爭運動嘅文宣之中，已經多次衝出連登，衝出香港。〈818大遊行要百萬人就唔好咁懶啦〉Post講，唔止要入去親子王國、香港網上討論區留言，FB、IG都要日日洗版，仲要走出去街頭派傳單，放映會同連儂牆都要Keep住做。巴絲打仲重申：「勇武和理非從來無割席分化，再造百萬人奇蹟！」咁多文宣，咁有計劃，結果相信一定唔會令巴絲打失望。
image source:LIHKG 818大遊行要百萬人就唔好咁懶啦
講到文宣，又點可以唔提Airdrop？
Airdrop都可以做文宣
——香港人最叻諗計仔
IPhone嘅Airdrop功能，可以透過藍芽功能快速咁傳播相片畀其他人。連登巴絲打好醒目，就利用咗呢個功能做「反送中」抗爭運動嘅文宣宣傳工具。〈Airdrop反送中攻勢又嚟喇 ［支那宝紅包］〉Post入面，佢哋整咗幾張圖，係改咗支付寶掃QR CODE有紅包嘅圖，只要一掃入去，就會連結咗去「香港警察暴行實錄」嘅YouTube影片。咁有創意又咁實用，難怪大家都咁支持喇！
Image source:LIHKG 〈Airdrop反送中攻勢又嚟喇 ［支那宝紅包］〉
連登萬全之計，現場斷網點做好？
睇咗上面細數幾個連登熱門Post，相信大家都會同意，連登真係香港抗爭者嘅重要溝通平台。不論係行動方向、理念，以至點樣令更多人知道呢件事，點樣去做好文宣工作，都有唔同嘅巴絲打討論。但你又知唔知，原來佢哋仲有傾過，當現場網路唔穩定，甚至香港政府真係斷網嗰陣，香港抗爭者又點可以點做呢？
612：上得戰場，溝通最重要
——telegram最基本
612警民衝突，警察狂放幾十粒催淚彈，警察嘅武力已經比過去升級咗。〈以現場感受分析點解十幾粒催淚彈就夠收皮〉Post講到Telegram，重組返抗爭者嘅現場溝通，收集資訊嘅地方，就相當重要。一個正確嘅消息，逃生嘅方向，隨時係救人一命。咁Telegram簡直就係最基本嘅，相對其他軟體保密，而且又多群組發放情報，難怪而家個個都用Telegram喇！
image source:FB 民間人權陣線 Civil Human Rights Front
624：Telegream有新嘅功能
——可能要小心用喎
〈Telegram更新有類似FireChat功能〉嘅Post指出，Telegram喺6月更新咗個新功能，好似另一個軟體FireChat咁喎。內文引用更新資訊，指出「Location-Based Chats」功能，可以開設一個地區群組，同附近嘅人可以即時傾計，傳播資訊。不過其中「Add People Nearby」嘅功能時，小心俾人起到底，一定要取消telegram 個location定位先可以用。
image source:FB 香港眾志 Demosistō
724：政府斷網？FireChat喇
——安裝定先無蝕底
FireChat係咩嚟？其實早喺2014年嘅雨傘運動，已經有唔少人用緊，亦都介紹過。FireChat嘅功能好似無線對講機，唔需要有網路，經由藍牙、Wi-Fi或蘋果公司嘅多點連線形成無線網狀網路嘅連線，都一樣可以同附近嘅人傾計。正因為咁，〈政府放風戒嚴, 有機會斷網絡〉Post入面，先會有巴絲打留言提議，話不如叫大家用返FireChat。無論點樣，裝定先，總先無蝕底嘅。
image source:FB FireChat
分析說明：
本研究資料由《KEYPO大數據關鍵引擎》提供，分析時間範圍為2019年06月08日至2019年08月17日、2019年08月10日至2019年08月17日。
網路大數據系統觀測港澳地區上萬個網站頻道，包括新聞頻道、Facebook、Instagram及各大討論區、BLOG等，針對討論『8.18集會、抗爭傳播途徑』相關文本進行分析，並根據網友就該議題之討論，作為本分析依據。
本文分析之結果，非參考投票、民調、網路問卷等資料，名次僅代表網路討論聲量大小，不代表網友正負評價。
