為減肥密做運動 JW同男友行山偶遇發哥

正所謂上得山多終遇發，好多藝人或者香港人去行山都成日撞到周潤發，撞到發哥當然就係合照然後放上網耀武揚威，最新晒命藝人有JW，因為呢期抗疫肥咗唔少，幾厚肉嘅佢決心搣脂，做運動加戒澱粉質一星期，佢話減咗兩磅，認真恭喜晒。今日佢同富貴男友Tarzan及張艾嘉囝囝Oscar一齊去行山，然後撞到發哥，睇吓JW講咩:「發哥真係好好人呀， 好鍾意好鍾意佢呀，咁早一齊行山乜都抵呀。」究竟發哥對佢做咗咩令佢覺得對方好好人?JW Post相到IG後，林德信、鍾舒漫及林奕匡都表示驚訝及羨慕，相信全民上山撞發哥不是夢。