《向西聞記》上周播出單元《咖喱雞》後反應超好，今日 ( 4月26日 )將推出由張沛樂（沙律）和陳安立（Brian）主演的單元《PTGF & PTBF》。兼職女友及兼職男友為近年興起的爭議性暗黑行業，這個新單元正是講述做 ptgf ( part time girl friend ) 的沙律遇上 abc 陳安立，導他入行做 ptbf (part time boy friend ) 之餘，仲親自傳授食女攻略，不過兩人卻在複雜的感情世界開展一段純純的關係，Brian 更上演甜蜜公主抱，抱住沙律行海旁。
片中自然有提到時下港男港女的情感，沙律教Brian溝女要簡單直接，在「又高又型又靚仔，講咩都係道理」的「金科玉律」之下，就應該兜口兜面同對方講「今晚我想X你！」沙律笑說戲裡面講粗口冇咩心理障礙，因為好多時啲戲唔俾講粗口，有得講嘅時候相對令自己放啲。「不過我平時甚少講粗口，唔會好似戲入面咁粗口爛舌。拍呢套戲係輕鬆同有啲興奮，因為見到啲對白又講粗口，又有少少鹹濕成份，都幾搞笑。」
至於 ptgf 這種特殊行業，其實沙律不太了解，「開頭好唔明點解要做呢個行業去搵錢？冇可能要用自己身體嚟交換，但當我接咗呢個角色，就認真諗佢哋嘅心態，好似呢個角色嘅設定佢因為俾男人呃，感情受創，唔係真係為錢，呢個行業令佢認識更多男人去了解同溝通，知道男人需要啲乜嘢，點樣去做好一個女朋友，我諗嘅係反而內心嘢多，ptgf 唔等如做雞。」
Brian覺得今次演出很好玩，其角色由純純兔受到誘惑成為 ptbf 甚至職業高手，遊走不同女性之間，再走上成魔之路，逐漸迷失；拍前他除了上網睇真實的 ptbf 剖白外，更煲李察基爾的經典電影《美國舞男》( American Gigolo ) 作為參考。
至於公主抱沙律一幕，Brian表示冇難度，他笑說：「佢咁fit，好輕盈，我哋本身又認識，冇咩激情戲，但我幾欣賞編劇，講我同沙律各自喺複雜世界變咗好複雜嘅人，產生嘅感情就好單純，想回歸基本，有對比喺度係寫得好有趣。我哋最難搞反而係玩夾公仔機嗰段戲，夾咗百幾二百次先夾到，所以最後成功夾到係好開心。」
Text：機
