同為議員 強烈對立
相信大家都知道香港立法會議員分為兩大派別：民主派同建制派。兩邊派別從字面上意思就可以知道，民主派係主張民主、自由，一直爭取公民提名、真普選，反對中國共產黨一黨專政，喺好多遊行示威都可以見到呢班議員嘅身影，相反建制派就係由一班擁護中國共產黨嘅議員組成。喺反送中運動入面，兩派對立嘅議員有好多唔同嘅衝突，亦引發唔少小風波，今日DailView就用網路大數據調查咗以下呢十位，就係喺反送中運動到目前為止，討論度排名前十高嘅議員，一齊回顧吓佢地喺呢兩個幾月嚟做過D咩啦。
DV小教室：網路溫度計透過《KEYPO大數據關鍵引擎》大調查觀測咗近萬個網站頻道（而且不斷增加ing），包括港澳地區的新聞頻道、FB、IG同埋各大討論區、Blog……透過強大嘅網文爬梳觀測，攞到巨大嘅資料樣本數，拎到上億嘅文章及留言訊息，以人工智慧的語意程式做分析
10 梁君彥（46996筆）
當初原定喺6月12嘅《逃犯條例》二讀，因為現場抗議情況激烈，建制派議員無辦法進入議場開會，最後立法會主席梁君彥宣佈唔開會，示威行動成功攔截二讀。而喺反送中運動進行得如火如荼之際，6月26號立法會大會原本會審議由保安局提交嘅法案，當中包括將中環海濱長廊中一段150米長嘅地方變為軍事用地。但梁君彥決定批准張華峰無預告嘅休會辯論，姐係話民主派嘅廢除附屬法例議案唔可以喺議程上討論，亦即係表示條例會喺6月29號自動生效，殺大家一個措手不及。
image source:Facebook/Stand News 立場新聞
9 蔣麗芸（47961筆）
蔣麗芸一向語出驚人，之前沙田示威，有一名外國男人舉住手機拍攝，「手勢學家」蔣麗芸就將呢個男人當時嘅「手勢」逐一拆解，話佢係外國勢力，呢D小動作就係指揮緊示威者進行衝擊。仲話有實質證據證明一班後生示威者收咗錢，但當主持問有咩證據，佢又話唔想諸連太多人所以唔公開。之前曾經有疑似唔記得轉帳號而自己覆自己的情況，依家仲有個ann姐後援會，話全力之持Ann姐取代林鄭做特首，呢排大家精神都好緊張，大家有興趣可以去望望入面内容，笑下放鬆心情。
image source:Facebook/ 蔣麗芸議員
8 譚文豪（50277筆）
九龍區反修例遊行之後，警方喺旺角清場，當日深夜12點譚文豪嚟到現場要求同指揮官對話，因為當時示威者已經走得七七八八，佢要求警方唔好再推，即使有女記者被推倒，但佢表示警方無停止推進，好似食咗藥咁。曾經係國泰民航機師嘅譚文豪前排都有代表活動發起人向警方申請喺機場機會嘅不反對通知書，一班航空業人員都透過譚文豪發公開信，要求政府回應五大訴求，否則會發起影響機場運作嘅不合作運動。
image source:Facebook/ 譚文豪 Jeremy Tam
7 張超雄（57726筆）
喺特首宣布修訂逃犯條例工作已經壽終正寢之後，張超雄提出私人條例草案，將台灣納入引渡條例內，以單次引渡方式將逃犯引渡至台灣。原意當然係為咗處理之前發生嘅港男台灣殺人案，但唔少人擔心呢個私人草案會令建制派偷步再次啟動逃犯修訂條例，到時仲會牽連身在台灣嘅香港政治犯，於是後來張超雄宣布，為免令反送中運動失焦同造成其他爭議，決定撤回草案。
image source:Facebook/Fernando Chiu-hung Cheung 張超雄
6 毛孟靜（64739筆）
毛姨姨係民主派會議召集人，多年擔任傳媒經驗，仲精通中英法文，咁多年一直為落實真普選而努力。喺反送中運動多次帶領一班民主派議員發言，譴責特首同政府處理手法，批評特首倒果為因，顛倒黑白。因為多年從政經驗加上講嘢有條理又清晰，多次為示威者發聲，連登網友都話要認毛姨姨做契媽。接受訪問嘅時候毛孟靜話自己都認老，但絕對理解年輕人做法，堅持唔會同年輕人割蓆。
image source:Facebook/ Claudia Mo/毛孟靜
5 鄺俊宇（101540筆）
鄺俊宇有三個身分，議員，作家同社工。2016年以49萬選票成為香港最史上高票嘅立法會議員。喺反送中運動入面經常企喺前線，監察警察執法，調停警民衝突，為示威者提供支援，仲曾經因為長期勞累而喺現場暈低，因為出心出力企喺前線，被大家捧上神檯叫做「鄺神」。村上春樹有句名言：雞蛋同高牆之間，佢選擇企喺雞蛋個邊。而鄺俊宇就話，雞蛋與高牆，佢會企喺雞蛋前面，保護佢哋。而鄺神都真係講得出做得到，好似有分身術一樣，出現喺各個示威活動入面，有幾仆心仆命有目共睹。
image source:Facebook/鄺俊宇kwongchunyu
4 葉劉淑儀（104493筆）
一直大力支持通過《逃犯修訂條例》嘅葉太，由雨傘革命開始到依家反送中運動，佢都話呢D示威行動都係有外國勢力參與，8月8號一個電台節目上，佢同葉國謙異口同聲話從示威者嘅裝備、資源同策略嚟睇，示威者背後一定有外國勢力指揮。仲話示威者識得用Telegram，連登同 AirDrop發起集會，呢D都係證明有幕後大佬，連主持人都忍唔住串佢：「個個後生都識用嫁喎。」即使政府當初宣布暫緩《逃犯條例修訂》，葉太都仍然企硬，話無收到消息要撤回，表示希望早日落實通過條例咁話。
image source:Facebook/新民黨 New People's Party
3 朱凱廸（109001筆）
朱凱廸同好多民主派議員一樣，企喺示威者嗰邊，之前金鐘站有警察大規模截查市民搜身，佢同鄺俊宇喺現場質問警員到底用咩準則搜身。7月23號朱凱迪同何君堯出席一個港台節目，討論得好激烈，到最後何君堯發脾氣拍檯離開，仲鬧朱凱迪係人渣，一班支持者都話辛苦曬朱凱廸，對住何君堯仲可以保持高EQ同冷靜應對。兩個人嘅恩怨仲未解決，同日何君堯祖墳被破壞，喺24號直播嘅時候一口咬定係朱凱廸支持者做嘅，甚至出言威脅。加上收到消息黑社會有落暗殺令，同埋覺得自己被跟蹤，最後朱凱迪報警處理。
image source:Facebook/八鄉朱凱廸 Chu Hoi Dick
2 林卓廷（139625筆）
7月21號元朗襲擊嘅新聞直播睇到好多人膽戰心驚，當時林卓廷自己都身在現場，亦都係被圍毆嘅市民入面其中一個，要入院縫針。事後民建聯議員指林卓廷喺現場帶領示威者挑機，而佢同何君堯因為元朗事件，兩個多次隔空開火，亦喺共同出現嘅場合正面口角。林卓廷喺呢場反送中運動參與度都好高，當時示威者衝擊立法會，仲曾經跪地求示威者停止激進行為，以免被警方捉住把柄武力鎮壓。721事件後嘅元朗遊行，一位中年阿伯指罵示威者，林卓廷用足15分鐘慢慢同佢解釋香港發生咩事，後尾成功感化阿伯，轉做幫在場示威者一齊叫口號，呢個行爲令大家都大讚。
image source:Facebook/林卓廷 LAM CHEUK TING
1 何君堯（713826筆）
何君堯排行第一絕對當之無愧，喺反送中運動入面，佢一直以黎都支持警隊執法，分別引起好多唔同大大小小爭議。當中引起社會最大反應就係7月21號喺元朗發生白衣人無差別打市民之後，何君堯喺元朗同嗰班白衣人握手，拍手迎接佢，甚至讚何君堯係英雄。呢D行為令好多人懷疑佢同呢次襲擊有關，引發網民一連串同佢嘅罵戰。近期，何君堯以曱甴呢個帶有仇恨嘅字眼稱呼示威者，後來一班前線警員同佢嘅支持者都開始有樣學樣。佢唔止支持警察驅散曱甴，早前同網民對罵，叫對方「自慰」，拒絕道歉之餘，仲話對曱甴無性騷擾，一而再再而三激起示威者嘅怒火。行爲令唔少時市民都留言指責，問佢到底點樣做到律師。
image source:Facebook/ 何君堯 (Junius Ho Kwan Yiu)
分析說明：
本研究資料由《KEYPO大數據關鍵引擎》提供，分析時間範圍為2019年05月18日至2019年08月15日。
網路大數據系統觀測港澳地區上萬個網站頻道，包括新聞頻道、Facebook、Instagram及各大討論區、BLOG等，針對討論『十大立法會議員』相關文本進行分析，並根據網友就該議題之討論，作為本分析依據。
本文分析之結果，非參考投票、民調、網路問卷等資料，名次僅代表網路討論聲量大小，不代表網友正負評價。
