[柴古唐斯括蒼越野賽2019] 完成已不簡單的賽事

除左4-5年前因工作，要不時往來上海、廣州、深圳外，其實我都好少返內地。但今次有機會番國內比賽，真係要多謝 Salomon 同 Suunto 俾機會我上去開下眼界，真心估唔到國內賽事可以咁有規模，比香港不少賽事都搞得更要好。

因為Salomon 贊助之比賽，好難得可以來一張中港台 Team salomon 大合照 (左至右) 鄧國敏(中)，閂龍飛(中)，小弟，Julia，Karen，周青(台)，Janice

柴古唐斯越野賽成為近年國內最火熱既比賽之一，相信是因為2017 Salomon 教父帶一班 international Elite 來舉辦精英訓練營有關，例如，香港好熟悉既國內好手鄧國敏，就係2017精英營出來既精英跑手。所以柴古唐斯能吸引不少高手參加，好似 Hayden Hawks (ITRA 923，CCC，Lavaredo 冠軍)，祁敏 (2018 CCC 亞軍，HK 100紀錄保持者)，姚妙 (2018 CCC 冠軍，HK 100紀錄保持者)，賈俄仁加 (2018 OCC 冠軍)………etc 可見精英雲集，比賽含金量極高!

比賽簡介

今年比賽有3個組別，分別為110km，80km 同50km，有近2500人參加! 而小弟一向穩陣，由於怕人生路不熟，又驚水土不服 (因為我係勁易肚痾既人)，所以我決定先體驗下50km，玩過一次之後先再挑戰再高里數。而最後，我都覺得我決定係無錯……HAHA

註:今屆柴古唐斯越野賽的完賽率: 110km: 38.7%、80km: 33.3%、50km: 87.2%，所以話完成已不簡單!

賽前會場佈置及race pack安排

大會取 race pack 及簡介會位置，位於臨海體育館。會場佈置得唔錯，氣氛亦好好。簡介會邀請左一眾精英跑手在台上分享。好認真，好有規模……真心讚!

Gear Check 十分認真，要經過5,6個關口，工作人員會攞著個Checklist 同你逐樣對

一如好多國際賽，都是要先 Gear Check 後先可再取 race pack。而 Gear Check 亦十分認真，要經過5、6個關口，工作人員會攞著個 Checklist 同你逐樣對，缺一即叫你走……好嚴格，好認真同我上年去過既 UTMF 有得揮。過5關斬6將後……終於攞到 race bib，而手帶會即時幫你帶上避免你找替腳。

比賽日

80、50km起步時間為6:30am，大會指定的酒店5:30am安排了巴士接送跑手到起點

當日不停下雨……預左都係爛地戰一場! 如果要簡單咁講賽道係點，就四個字: 先苦後甜。頭半程主要為攀升較多，後半程為下坡為主，只要留到力係落山衝，就可以賺番好多時間，所以建議大家可以選擇留前鬥後。而我當日比賽算是成功，在頭半程排名為73，最後在後半程追番近30名!

頭半程28km

一開始4km為平路跑，圍繞著名的江南長城跑一圈，之後入山後，主要為攀升較多，而且中間混集爛泥地，濕滑青苔石，跑起上來都十分費力。特別在12km之後，路況都幾差，啲爛泥地跣到PK………老實講著乜鞋都無用，我自己都跣左幾次，全身都係泥。有唔少人都要「屁降」，pat pat 落地 sir 落去……而熬過頭20K左右，狀況就會好好多，慢慢會多啲可跑性較高既路段，頂到28K既 CP 就一天光晒!