身兼政府專家顧問嘅港大微生物學系講座教授袁國勇啱啱透露，政府將會向市民派發可重用多次嘅口罩！但大家唔使高興得太早，事關等政府派呢批口罩都不知要等到何年何月，想戴口罩都係靠自己比較穩陣。呢排日本唔少品牌都紛紛推出口罩應付疫情，其中生活日用品品牌無印良品亦唔例外，啱啱喺5月1日於旗下網店限定推出經抗菌防臭加工嘅可洗布口罩，一推出即成為話題，而且喺翌日售清，相當巴閉！簡單介紹一下，呢款採用100%綿製嘅3層口罩，擁有出色嘅通氣性及吸水性，兼且表面經抗菌加工，就算洗濯約30次依然能夠使用。更吸引嘅係價錢，分別有2個裝、4個裝及8個裝發售，售價分別為999日圓、1,998日圓及3,996日圓），計落一個口罩嘅售價唔使HK$40，性價比十分高！難怪日本網民對呢款無印口罩讚不絕口，即使每人限買一份，依然一推出即被搶購一空。不過相信遲啲會補貨，有興趣嘅朋友不妨留意喇。
網址：https://www.muji.com/jp/ja/store/cmdty/detail/4550344279700
東網網站 : https://on.cc/
東網Facebook專頁 : https://www.facebook.com/onccnews/
