今時今日，唔係話要廚藝超群，煮到識飛至可以入廚，只要肯試肯煮，人人都係大廚，之不過除咗煎炒煮炸之外，大家又識唔識燒燜煀扣等烹調方法呢？其實唔需要識晒，起碼知己知彼，學多一兩道板斧，有人問起都唔會口窒窒吖麻！
－－－－－－－－－
之前連續幾期介紹勁有鑊氣嘅「爆」煮方法，今期開始一連幾期就會講吓「煎」呢種烹調方法。煎，有說源自北魏時期，《齊民要術》指，煎是以小火將鍋燒熱後，下適量嘅油，燒熱，放入經過處理嘅食材，慢慢加熱至成熟嘅烹調方法。炮製時要留意，需先煎好一面才煎另一面；也可以兩面反覆交替煎，用油量亦不宜浸過食材，煎時亦需不斷搖晃鑊身或用鏟翻動，令食材兩面受熱均勻，直至呈金黃色澤或表皮酥脆。
煎，亦有另一種意思，指將東西放入水入面煮，讓其所含成分分解於水中或與水融合，常用於煎茶、煎藥。
此外，煎亦有多個種類，如生煎、乾煎、煎封等。今日介紹嘅係生煎，顧名思義，即將食材由生煎熟後直接食用，一般而言，將生食材經過刀工處理之後，入底味（下調味醃製），不用二次味，上粉或上漿、甚至直接下熱油鑊直接煎成金黃酥脆而成；如生煎雞翼、生煎豬扒、生煎包等。
【生煎雞翼】
材料：
雞翼 16隻
鹽 2湯匙
米酒/紹酒 1湯匙
薑片、葱段 各適量
油 少許
胡椒 少許
做法：
1. 雞翼解凍後以清水沖洗乾淨，瀝乾水後以薑、葱、酒及鹽醃上1小時，想更入味可以醃過夜。
2. 用廚房紙印乾雞翼水分，燒熱鑊，鑊熱下油，油熱下雞翼。
3. 轉中火將雞皮一面煎至微微金黃後翻轉，煎至雞翼沒有滲出血水便熟。
