新冠肺炎疫情持續，政府早前宣布健身室同體育館等運動場所要繼續關閉，少咗地方做運動，相信唔少市民，尤其係運動員就更加唔習慣。政制及內地事務局前局長譚志源今日(8日)主持母校香港大學嘅節目時為咗力證自己後生都係運動員，竟然公開咗當年讀書時做運動嘅相，有頭髮嘅譚志源你又見過未？
譚志源邀請咗三位運動員上節目分享疫情之下做運動嘅心得，譚話自己平時都有打開高爾夫球同埋去健身架，不過依家疫情底下少咗做運動，搞到肥咗成十磅添啊！不過譚都好認同運動嘅重要性，佢話要成功抗疫，喺有疫苗之前惟有靠自己嘅抵抗力。佢又話之前同一班運動員一齊去探訪基層，指基層人士都好鍾意運動員健康、陽光嘅氣質，所以覺得運動對基層醫療同健康係非常之重要架。
去到直播嘅尾聲，譚話自己以前都係一名運動員嚟架，就公開咗當年中學運動會啱啱跑完四乘一百米接力嘅相，同埋讀港大時做太古宿生會主席時的舊照。譚志源無講大話，不過兩張相最引人注目嘅位，相信係譚一頭濃密嘅頭髮，簡直係青春嘅象徵。
東網網站 : https://on.cc/
東網Facebook專頁 : https://www.facebook.com/onccnews/
