一罩難求下，唔少人就向議員求助，希望佢哋能夠幫手張羅口罩派畀街坊。議員柯創盛(柯仔)就話有唔少街坊走到佢嘅議辦問有冇口罩派，佢甚至試過發夢夢到自己喺度撲緊口罩！
之但係，就算做到議員都唔代表會比普通人容易啲撲到口罩。柯仔就話其實佢哋唔係唔想派，而係真係冇口罩可以派，所以每次有街坊到佢嘅議辦時，佢都只能夠好無奈咁話畀街坊知，佢哋暫時未有口罩派。不過，當街坊得知冇口罩派時，有唔少都主動留低聯絡資料，叫佢一有貨就通知佢哋嚟拎咁話喎。
為咗節省口罩消耗，早前有醫生教路，指可以用全新信封暫存口罩，以延長使用時間，避免浪費只戴咗短時間嘅口罩。柯仔就提到，呢個報道出咗街之後，依家唔止口罩難求，就連信封都好難先買得到。佢又話呢日戴緊嘅都係重用嘅口罩，仲話自己因為買唔到信封，唯有用住議辦啲信封頂住檔添！
東網網站 : https://on.cc/
東網Facebook專頁 : https://www.facebook.com/onccnews/
